Flat Earth Society
|
C'l artìcul chè 'l è scrit in
Miranduléś |
La Flat Earth Society (Asuciasiòṅ dla Tèra Piàta) l'è n'asuciasiòṅ nada in dal 1956 in Inghiltèra ch'la pòrta avànti l'idéa ch'la Tèra la sia piàta. Adès la sò sēd l'è in Califòrgna.
Urìgini
Òṅ di prim sustenidōr dla teurìa dal tèra-piatìśum 'l è stâ William Carpenter ch'in dal 1885 'l à publicâ a sò spéśi 'n upùscul intitulâ „One hundred proofs the Earth is not a Globe“ (Sènt próvi ch'la Tèra la n è minga 'n Glôb). Una 'd cal próvi lè par Carpenter 'l éra 'l fat che gnanc 'n astrunàuta al psiva dir 'd avēr vdû dal curvadùri su la superfìsi dal pianēd anc druànd di balòṅ aéro-stàtig par dar di uciàdi da l'élta.
Par 'l invintōr ingléś Samuel Birley Rowbotham al mónd 'l éra 'n disc c'n al pôl nòrd in dal mèś e 'l pôl sud tut 'd intóran che, c'n i sò mûr 'd giàs, 'l éra bòṅ ad farmàr l'àqua di uséan prima ch'la caschìs 'd fóra. Chi lò 'l à publicâ di scrit cun di sò esperimènt dgénd ch'al fat ch'al nâṿ i sparìs'n a 'l uriśònt 'l éra sōl p'r un efèt pruspètig. A la sò mòrt al sò idéi i èṅ stadi purtàdi avànti da di sò sustenidōr ch'i ìvan dâ vita a la Universal Zetetic Society e pò da i cristiàṅ americàṅ dla Christian Catholic Apostolic Church.
La Flat Earth Society
.gif)
In dal 1956 Samuel Shenton, mémbar dla Royal Astronomical Society, al fónda la Flat Earth Society da 'l séndri dla Universal Zetetic Society purtànd avànti la teurìa dal cumplòt dla NASA, dgénd ch'al sò fóto dla Tèra da 'l spasi, ch'i mustràvan ch'la gh'iva la fórma dna bòcia, i psìv'n inganàr di òć minga tant espèrt e ch'al śbarc su la Luna l'éra tuta na muntadùra, un cìnema.
A la mòrt ad Shenton a cap dal muimènt a gh và 'l texàṅ Charles Kenneth Johnson ch'in dal 1980 al pùblica 'n artìcul su Science Digest in du 'l diś che l'idéa 'd un glôb ch'al prila l'è na cuspirasiòṅ cóntar Mosè e pò che se la Tèra l'è na bòcia, alóra la superfìsi dna masa granda 'd àqua la gh'arév da èsar curva mo invéci qvéli di lâg Tahoe e Salton i n i èṅ briśa.
Par cóntar-bàt'r a 'l fat che 'n aparéć al pōl rivàr a èst vulànd a òvest, un quèl pusìbil sōl se la Tèra l'è na bòcia cuma tut chi àt'r àstar, qvéi dla Flat Earth Society i aṅ tirâ fóra la spiegasiòṅ ch'i gh'èṅ dal pòrti ch'i funsiònan cuma in dal śōg vìddeo ad Pac-Man[1] in dua, a 'l sèntar dal labirìnt, a gh'è 'n andavèṅ da i dū cantòṅ ch'al gh parmét ad pasàr subìt da cl'atra banda.
Par di àtar sustenidōr dal tèra-piatìśum l'Austràglia la n eśìst minga ma l'è tuta na cumèdia strulgàda da 'l guèran britànic par quaciàr i masèi ad masa fat cónt'r i criminài ch'i dgnìv'n ad purtàr in c'l àtar cuntinènt[2].
Al muimènt al gh'à di sustenidōr anc in Itàglia[3] e 'l 12 ad Maǵ dal 2019 a gh sarà 'n cunvégn mundiàł a Palèrum di tèra-piatìsta[4].
Nòti
- ↑ Risòlt al rébus dla Tèra Piàta, al pianēd al funsiòna cuma Pac Man Il Corriere della Sera, 3 ad Maǵ dal 2018
- ↑ La teurìa nóva di tèra-piatìsta: «L'Austràglia l'è na bala, la n eśìst briśa» Il Mattino, 6 ad Śugn dal 2018
- ↑ «A sém di tèra-piatìsta e dònca a n paghém minga 'l trêṅ». 'L Intercity férum n'óra La Repubblica, 19 ad Mars dal 2019
- ↑ Beppe Grillo al diś ch'l andrà a 'l cunvégn di tèra-piatìsta, 'l urganiśadōr Favari: “Par mè al M5s 'l è influensâ da la Cia” Il Fatto Quotidiano, 29 'd Avrìl dal 2019