Fabrizio Bracconeri

 Miranduléś

C'l artìcul chè 'l è scrit in Miranduléś

«

La pastasciutta è l'alimento più completo che ci sia, ti dà la forza di sorridere, ti porta l'allegria, la pastasciutta è la mia dieta e di migliori non ce n'è, se vuoi star bene mangia 'a pasta insieme a me.»

(IT)(La pasta asciutta, 2009)

«

La pasta suta l'è 'l magnàr più cumplét ch'a sa gh sia, la t dà la fòrsa 'd surìdar, la t pòrta cuntintésa, la pasta suta l'è la mè diéta e 'd mijóri a n ag 'n è minga, s'at vō star bèṅ magna la pasta mèg.»

(MUD)

Fabrizio Bracconeri (Róma, 26 ad Śugn dal 1964) 'l è 'n persunàǵ televiśìṿ e atōr itagliàṅ. In dal 2014 al s è candidâ a 'l parlamènt europèo p'r al partî 'd dèstra dla Giorgia Meloni, Fradèi 'd Itàglia, lò ch'l iva pròpria recitâ in na pelìcula ciamàda Fratelli d'Italia in dal 1989. 'L è rós ad cavìi e al gh i à ris.

In dal 2009 'l à fat vgnir fóra 'n sìngul digitàł da 'l tìtul La pasta asciutta. 'L à tòlt mujér e 'l gh'à abû quàtar fiōi.

Biugrafìa

Carsû in dal quartēr pupulàr ad Primavàl a Róma, Fabrizio al fà 'l sò debùt a 'l cìnema in na pelìcula 'd Carlo Verdone dal 1983, Acqua e sapone, ma 'l sucès par lò al riva in dal 1987 quànd al fà 'l ciciòṅ Bruno Sacchi in dal telefìlm I ragazzi della 3ª C.

In séguit al lavóra in televiśiòṅ in dal prugràma dla Rita Dalla Chiesa Forum da 'l 1993 a 'l 1996 e pò da 'l 2004 a 'l 2013. Finìda cl'esperiénsa lè, Bracconeri al s dà a la pulìtiga candidànd-'s a gl'elesiòṅ européi dal 2014 par Fradèi 'd Itàglia ma al n vîṅ minga elèt.

In dal 2017 un studènt, faghénd finta 'd èsar lò, al scriv un tweet dimóndi pēś su la parlamentàra emigliàna dal PD Cécile Kyenge: «A t ò catàda, n dì't gnint di tò fradèi 'd mèrda MUSLIM? At sē abituàda, at cgnós i vóstar cumpurtamènt c'n al cavri, no?». Bracconeri, durànt 'n intervìsta dada a Radio Cusano Campus, al precìśa ch'l à fat denùnsia e che lò al n l'à minga uféśa parchè al gh'à dâ sōl dla Buzzicona (Cicióna) e ch'a dmandàr scuśa la gh'à da èsar lē a gl'itagliàṅ, pò al finìs dgénd ch'al dóni ch'i spóś'n i musulmàṅ in Itàglia i èṅ tuti dal budlòni ad 130 chilo e 'l è par qvàl lè ch'i i diféndan, parchè sinò i n catarévan gnanc 'n óm dispòst a mét'r-as sèg e ch'i musulmàṅ i i tōśan p'r avēr un tónd cald e p'r avēr na qualchidùna 'd purtàr-'s a lèt invéci 'd andàr c'n al cavri. Sèmp'r in dal 2017 Fabrizio 'l iva dâ adòs a la presidènta dla cambra Laura Boldrini («A gh'arévan da piciàr-uv tut esénd ch'a pinsâ sōl a i cas vòstar e di clandistèṅ!!! MALNÉT»), a la giurnalìsta Giovanna Botteri («Cla rója chè a gh'ém anc da pagàr-la») e a i clandistèṅ («A v parirà asûrd e a m piànś al cōr a dir-al ma sōl 'n atintâ in Itàglia a s cavrà da i maròṅ al PD e i CLANDISTÈṄ... pò l'arvòlta»).

Filmugrafìa

• 1980 - Arrivano i gatti, regìa ad Carlo Vanzina
• 1983 - Acqua e sapone, regìa ad Carlo Verdone
• 1984 - Mi faccia causa, regìa ad Steno
• 1984 - Amarsi un po', regìa ad Carlo Vanzina
• 1987 - Animali metropolitani, regìa ad Steno
• 1989 - Fratelli d'Italia, regìa ad Neri Parenti
• 1992 - Saint Tropez - Saint Tropez, regìa ad Castellano e Pipolo
• 1994 - Attenti a noi due, regìa ad Mariano Laurenti
• 2005 - Gas, regìa ad Luciano Melchionna
• 2012 - Buona giornata, regìa ad Carlo Vanzina
• 2015 - Un Santo senza parole, regìa ad Tony Gangitano

Culegamènt estéran

• (EN) Filmugrafìa in s'l IMDb

Nòti