Epitaph - Follia omicida
|
C'l artìcul chè 'l è scrit in
Miranduléś |
 Epitaph
| ||
| Epitaph - Follia omicida | ||
 La Delores Nascar in na figùra dal film | ||
| Patàfi - Matéria masadōra 1988 | ||
|---|---|---|
| Regìa: Joseph Merhi | ||
| Scritōr: Joseph Merhi | ||
| Atōr: Natasha Pavlovich • Delores Nascar Mike Mendoza • Liz Kane • Jimmy Williams Ed Reynolds • Paula Jamison • Flint Keller Linda Tucker-Smith • Richard W. Munchkin | ||
| Müsica: John Gonzalez | ||
| Léngua: Ingléś | ||
| Dürä dal film: 94 minüt | ||
| Nasiōṅ: Stat Unî | ||
Epitaph - Follia omicida (Patàfi - Matéria masadōra) 'l è 'n film ad scarésa americàṅ dal 1988 ad Joseph Merhi, regìsta siriàṅ, ch'al 'l à anc scrit.
Sunt
Forrest Fulton (Jim Williams) 'l è spuśâ cun la Martha (Dolores Nascar) e la gh'à na fiōla ad séd'ś an, l’Amy (Natasha Pavlovich). Al decìd ad cambiàr cà insém a sò màdar Virginia (Liz Kane) e a la sò famìja. La Martha l'è n'imbariagòsa cun di prubléma in tèsta. L'è spurcaciòna, specialmènt quànd la bév, ma la gh'à anc sèmpar paùra 'd èsar viulentàda. Un dè la s mét a far la daśnumóśa in camìśa da nòt cun David al śbiangśèṅ (Ed Reynolds) ma quànd quàl lè al gh diś «A m sòṅ fiacâ ad cal mistēr chè e 'd avēr da far cun dal rujàsi vèci cuma tè» lē la pèrd la tèsta e la 'l masa a scurtlàdi. A saplìr-'l in dal giardèṅ a gh pénsa sò marè che però 'l è arliâ sèg parchè l'iva prumìs ch'la n 'l arév più fat.
La dóna la gh 'n à anc cun sò fiōla parchè la n vōl briśa andàr a scōla ma, sōvra ad tut, parchè la và a drē a i masć, la 'n à catâ òṅ ch'al gh piàś dimóndi, al risulèṅ Wayne (Flint Keller), ch'al śōga a balòṅ e a tènis. Chi lò al gh'à dmandâ 'd andàr fóra sèg a 'l cìnema ma la Martha la n gh dà mia 'l parmés.
Al dè dòp Forrest al dmanda ajùt a na psicòluga, la Shirley Lewis (Linda Tucker-Smith), dgénd-ag che sò mujér la cata gust a far-as védar tuta scalvìda da i óm. Turnâ a cà però al s bèca un cólp ad pigòṅ in dla schina da David, turnâ in vita in cal méntar, e al mōr. Sò mujér però la gh'à al sćiòp prònt e la 'l fà turnàr a 'l Inféran dgénd-ag: «A 'l saìva ch'ta n sēr mia mòrt, a n t ò minga dâ 'l scurtlàdi giùsti!». Al dè dòp, dòp avér dâ śò a la pólvra, la nóna la gh dmanda: «Pòs-j-a ciamàr al becamòrt par mè fiōl?».
P'r andàr-'g a fónd e cumprénd'r i prubléma dla Martha, la Shirley la s fà viva faghénd finta 'd èsar na vśina 'd cà di Fulton. La prima vòlta ch'la la véd, l’Amy la taca a cuntàr-ag tut i sò fat e anc sò màdar la dvénta sò amìga śibénd-ag anc ad durmìr a cà sua. Quànd lē la gh dmanda in dua al fus sò marè, lē la gh diś ch'l è andâ via 'd cà. Quànd però la mata la capìs che lē la n stà minga in dal quartēr, la gh dà un cólp in tèsta par pò ligàr-la, dgénd-ag: «Guàrda chè che bel sórag, a 'l ò catâ in dal rusc». Dòp avér mis la póndga in un séć e avér-al fisâ a la pansa dla Shirley, la Martha la 'l fà dvintàr bujènt c'n un spuda-fōg par custrìnśar la bèstia a far-as strada c'n i dènt par la pansa. E 'l è qvél ch'a sucéd dabòṅ.
Dòp avér cupâ anc la Virginia, la dóna la s cava śò in frònt a Wayne parchè la in vrév da lò, ma quànd chi lò al s tira indrē, lē la gh buta adòs dla benśìna e pò la gh dà fōg c'n un fulminànt. A gh armàgn sōl l’Amy: l'è lē ch'la gh'à da scavàr la fòsa p'r al sò muróś mòrt ma la gh'à la vanga in maṅ.