Elisabetta Canalis
|
C'l artìcul chè 'l è scrit in
Miranduléś |
.jpg)
Elisabetta Canalis l'è na showgirl e atōra sardagnóla nada a Sassari al 12 ad Setémbar dal 1978. L'è alta 1,70 e al sò miśùri i èṅ 88-60-90.
P'r al mutōr internet ch'al cata al ròbi Yahoo, chi lē l'è la tèrsa dóna itagliàna più pascàda in dla réda in dal 2013, dòp la Sara Tommasi e la Belén Rodríguez[3].
Biugrafìa
Dòp avér tòlt al diplòma al clàsic la sa stablìs a Milàn par studiàr al lìngui a l'Università Statàla. In cal perìud lè la fà soquànt casting, in mèś a i quài a gh'è anc quél p'r al film Il pesce innamorato ad Leonardo Pieraccioni.
In dal 1999 la fà la valéta a i Telegàt, dla reclàm par di ciuculatèṅ e pò la vèṅ sarnìda p'r andàr a far la velìna a Striscia la notizia. La gh'a stà in fiṅ al 2002 insém a Maddalena Corvaglia, sò cumpàra.
Al du velìni i s càvan pò śò par far al calendàri dal 2002 dla rivìsta GQ, vindû a 12.000 franc, cun na tiradùra ad 700.000 còpi.
In dal 2003 'l è al tùran dal calendàri sexy dal mensìl Max. In dal stés an, la Canalis la dvénta la valéta dal prugràma spurtìṿ Controcampo (l'éra la muróśa d'l atacànt d'l Inter, Christian Vieri), traśmìs in sl'Italia 1 e la taca anc a recitàr in dla tèrsa e quàrta sèrie dla fiction Carabinér. Insém a Federica Fontana, la cundùś al prugràma còmic Ciro presenta Visitors mèntar 'l an dòp l'ardópia cun Super Ciro, sèmpar p'r Italia 1.
In dal 2004 la gh'à na part in dal videoclip ad Biagio Antonacci Convivendo.
Qualchidòṅ al gh buta i òć adòs faghénd-ag far dal parti in di sò film, cuma Deuce Bigalow - Puttano in saldo o Decameron Pie in dua la fà védar al téti.
In dal 2006 la tóś al pòst ad Michelle Hunziker in dal prugràma Love Bugs insém a Fabio De Luigi e pò la rècita in dal cinepanetòṅ Natale a New York ad Neri Parenti in du la fà la fióla ad Christian De Sica. Sèmpar cun lì lò la gira anc dla reclàm par na cumpagnìa ad telefunèṅ.
In dla stagiòṅ 2006/2007 l'è incóra a fiànc ad Sandro Piccinini in Controcampo Ultimo Minuto.
In dal 2007 la lavóra insém a la Gialappa's band e al Mago Forest a Mai dire Martedì. In istâ la preśénta 'l Festivalbar insém a Giulio Golia e a Enrico Silvestrin.
In dal 2009 la prénd al pòst 'd Elena Santarelli in dal prugràma Total Request Live par MTV e la vèṅ ciamàda in di Stat Unî par soquànti epiśòdi dal sèrie televiśìva Leverage - Consulenze illegali.
Insém a Gianni Morandi e a Belén Rodriguez la preśénta al Festival ad Sanremo dal 2011.
Al 22 ad Śugn dal 2011 'l atōr George Clooney, ch'al sira mis sèg da du an, al diś in un cumunicàt ch'i s èṅ mulâ e che la stòria 'd amór l'è finìda[4].
In dal Setémbar dal 2011 la vèṅ sarnìda par balàr in dal spetàcul televiśìṿ americàṅ Dancing with the stars (Balànd cun al stéli) ma dòp sōl dū puntàdi la vèṅ pò casàda fóra p'r al pùblic. A ś vèṅ anc a savér che la Canalis la s imbutìs al regipèt parchè un vìddeo al la tōś śò in di camarèṅ dal prugràma Ellen DeGeneres Show mèntar l'è drē a ficàr-as dèntar di spesōr[5].
Filmugrafìa
- 2005 - Deuce Bigalow - Puttano in saldo, regìa ad Mike Bigelow
- 2006 - Natale a New York, regìa ad Neri Parenti
- 2007 - Decameron Pie, regìa ad David Leland
- 2008 - La seconda volta non si scorda mai, regìa ad Francesco Ranieri Martinotti
- 2008 - La fidanzata di papà, regìa 'd Enrico Oldoini
- 2010 - A Natale mi sposo, regìa ad Paolo Costella
Fiction TV
- 2003/2004 - Carabinieri 3 - 4
- 2005 - Love Bugs
- 2008 - Medici miei
- 2010 - Fratelli Benvenuti
- 2010 - Leverage - Consulenze illegali
Televiśiòṅ
- Striscia la notizia (Canale 5, 1999-2002)
- Controcampo cun Sandro Piccinini (Italia 1, 2002-2007)
- Stelle a quattro zampe (Canale 5, 2002)
- Ciro presenta Visitors (Italia 1, 2003)
- Superciro (Italia 1, 2004)
- Striscia la notizia cun Maddalena Corvaglia (Canale 5, 2005, par na stmana)
- Mai dire Martedì cun Mago Forest (Italia 1, 2007)
- Festivalbar cun Enrico Silvestrin e Giulio Golia (Italia 1, 2007)
- Buona la prima cun Ale & Franz (Italia 1, 2007, na puntàda)
- Trofeo Birra Moretti cun Anna Tatangelo (Canale 5, 2008)
- Artù cun Gene Gnocchi (Raidue, 2008)
- Total Request Live cun Carlo Pastore (MTV, 2009)
- Festival di Sanremo cun Gianni Morandi e Belén Rodriguez (Raiuno, 2011)
Culegamènt estéran
Nòti
- ↑ A preferìs 'l óm americàṅ vanityfair.it, 10 ad Favràr dal 2011
- ↑ Elisabetta Canalis: «Sès in sal set? A Tarantino a gh dirév ad sè» virgilio.it, 5 'd Agóst dal 2012
- ↑ Al Mèteo e Sara Tommasi i èṅ al paròli più pascàdi in sal Yahoo! in dal 2013 Fastweb.it, 29 ad Nuvémbar dal 2013
- ↑ Fra Clooney e la Canalis 'l è finìda: a n stém piò insém libero-news.it, 22 ad Śugn dal 2011
- ↑ Elisabetta Canalis la s imbutìs al téti tgcom.mediaset.it, 29 ad Setémbar dal 2011
Àtar prugèt
Wikiquote contiene citazioni di o su Elisabetta Canalis
Wikimedia Commons contiene file multimediali su Elisabetta Canalis
