Devil dog - Il cane infernale
|
C'l artìcul chè 'l è scrit in
Miranduléś |
 Devil Dog: The Hound of Hell
| ||
| Devil dog - Il cane infernale | ||
 Na figùra dal film | ||
| Caṅ infernàł 1978 | ||
|---|---|---|
| Regìa: Curtis Harrington | ||
| Scritōr: Elinor Karpf • Steven Karpf | ||
| Atōr: Richard Crenna • Yvette Mimieux • Victor Jory Kim Richards • Ike Eisenmann • Martine Beswick Ken Kercheval • Lou Frizzell • R.G. Armstrong | ||
| Müsica: Artie Kane | ||
| Léngua: Ingléś | ||
| Dürä dal film: 95 minüt | ||
| Nasiōṅ: Stat Unî • Cànada | ||
Devil dog - Il cane infernale (Caṅ infernàł) 'l è 'n film ad scarésa dal 1978 ad Curtis Harrington girâ par la televiśiòṅ.
Sunt
Na séta ad satanìsta ch'la tîṅ a drē a 'l Diàvul, durànt na serimògna tgnuda da 'n prēt dóna vistìda 'd rós (Martine Beswick), la trasferìs al spìrit dal demòni in na cagna ad pastōr tedésc ciamàda Lady, cumpràda apòsta par sinc-sènt dòlar par far di fiōi. Soquànt tèmp dòp Mike Barry (Richard Crenna) e sò mujér Betty (Yvette Mimieux), turnànd a cà, i càtan par strada al sò caṅ Skipper mòrt, mis sóta ad prupòśit da na màchina négra. Cla mòrt lè la ruìna 'l cumpléan ad sò fiōla Bonnie (Kim Richards) ch'l'éra dimóndi tacàda a la bèstia. Mike al gh śibìs alóra ad tōr-an 'n àtar.
Al dè dòp, méntar la baghéta l'è fóra insém a sò fradèl Charlie (Ike Eisenmann), la véd 'n arvindrōl c'n al sò furgunsèṅ ch'al vénd dla fruta e dla vardùra par strada. In mèś a 'l casi a gh'è anc la Lady c'n i sò cagnulèṅ pìcui. La Bonnie la n pōl far àtar che tōr-'n in bras òṅ da 'l tant ch'l è dōls e bèl e 'l óm al gh al lasa vluntéra. La putìna la 'l pòrta a cà e la 'l ciàma Lucky. Tut la famìja l'è cuntènta 'd lò, a part la camaréra Maria (Tina Menard) ch'l'è dimóndi cardénta e la sènt subìt al śēl e al mâl ch'al s pòrta dèntar. Na sira, mént'r i Barry i èṅ fóra p'r un spetàcul, lì lē la cata la mòrt ciapànd fōg tulénd incòst a soquànti candéli che lē l'iva impisâ par pargàr la Madóna méntar la bistiulìna la la tgniva 'd òć cun d'l òdi.
Dvintâ più grand, Lucky c'n al sò uciàdi al próa a custrìnśar Mike a insfilsàr la sò maṅ fra 'l pali dna śgadōra impiàda ma lò al gh la cava a 'l ùltim minùt a tiràr-la via. In séguit al śbrandla viṿ al caṅ dal vśèṅ ad cà George (Lou Frizzell) ma a la Betty a n gh'è gnanc indivìś parchè l'è sèmpar da la sò banda. Dòp che 'l óm 'l iva ciamâ la pulisìa par denunsiàr al fat, al vèṅ catâ mòrt andgâ in pisìna. Anc Charlie al dvènta catìṿ, al n guàrda in fàcia a ninsòṅ p'r avér sucès in di elesiòṅ a scōla. Al prufesōr Miles Amory (Ken Kercheval) 'l è sicûr che lò 'l àppia anc strulicâ un piàṅ par far fóra un sò rivàł faghénd crédar che lò 'l iva fargâ 'n arlój par pò lugàr-'l in 'n lanternòṅ in clas. A gh pènsa 'l caṅ a métar-'l a pòst.
Vdénd ch'a la sò famìja a n gh in fréga gnint dal fat che Miles al sia mòrt, Mike al decìd 'd andàr-'g a fónd da par lò.