Delitto perfetto
|
C'l artìcul chè 'l è scrit in
Miranduléś |
 A Perfect Murder
| ||
| Delitto perfetto | ||
 La Paltrow e Douglas in na figùra dal film | ||
| Delìt parfèt 1998 | ||
|---|---|---|
| Regìa: Andrew Davis | ||
| Scritōr: Frederick Knott • Patrick Smith Kelly | ||
| Atōr: Michael Douglas • Gwyneth Paltrow Viggo Mortensen • David Suchet • Maeve McGuire Will Lyman • Sarita Choudhury • Michael P. Moran Stephen Singer • Reed Birney • Constance Towers | ||
| Müsica: James Newton Howard | ||
| Léngua: Ingléś • Àrab | ||
| Dürä dal film: 102 minüt | ||
| Nasiōṅ: Stat Unî | ||
Delitto perfetto (Delìt parfèt) 'l è 'n film thriller americàṅ dal 1998 'd Andrew Davis trat da 'n lavōr teatràl ad Frederick Knott e arfacimènt 'd un film 'd Alfred Hitchcock dal 1954, Il delitto perfetto cun la Grace Kelly e Ray Milland.
'L è custâ ssanta migliòṅ ad dòlar ma al 'n à fat sù da piò ad sentvìnt-i-òt.
Sunt
Steven Taylor (Michael Douglas), ad mistēr mànager dla finànsa ad New York, 'l è spuśâ cun l’Emily (Gwyneth Paltrow), una pîna 'd bèsi ch'la lavóra a 'l ONU faghénd dal tradusiòṅ ad léngui.
Un dè Steven al vèṅ a savér che sò mujér la gh mét i còran c'n al śōvan David Shaw (Viggo Mortensen), un pitōr buletàri e bohémien. Faghénd finta ad vlēr dar 'n òć a soquànt di sò quàdar, Taylor al và da lò e al gh diś ad savēr incòsa 'd lò, ch'al sò nóm 'l è Winston Lagrange, ch'l è 'n làdar ad quàtar sòld bòṅ sōl a fargàr dal dóni vèci cun di bèsi par purtàr-'g-i via e ch'l à imparâ a dipìnśar in parśòṅ e minga a Berkeley. Savénd 'd avér-'g al curtèl da la part dal mànag, Steven al gh śibìs un pat: in cambi ad sincsènt-mila dòlar, sènt-mila subìt, David al gh'à da far fóra sò mujér acsè lò al pōl catàr la vindéta ch'al pascàva e mét'r-as in bisàca i bèsi dal testamènt anc parchè i afâr i n vànan minga tant bèṅ par lò. Al mànager 'l à pinsâ a tut: méntar Shaw al và a cupàr-la, avénd-ag la sò ciàṿ d'l apartamènt, lò 'l andrà invéci a śugàr a 'l carti da di amìg.
David al gh diś ad sè ma la sira d'l umisìdi al n cata minga 'l curàǵ e al dmanda a òṅ ch'l à cgnusû soquànt an prima in parśòṅ ad far-al lò a 'l sò pòst. Ma quànd qvést chè al s insfìls' in cà dla vitma, l’Emily la gh la cava a cupàr-al méntar lò 'l éra drē a strusàr-la. Quànd Steven al tórna a cà e al véd sò mujér piànśar al capìs ch'l è andâ tut a 'l arvèrsa rispèt a 'l sò tragatèṅ. Par scanślàr tut al próvi al và subìt in cuśìna a pascàr la ciàṿ in bisàca dal mòrt e al la cata ma purtròp la ciàṿ la n è minga la sua ma qvéla dla cà dal farabùt.