Dave Mustaine

C'l artìcul chè 'l è scrit in Miranduléś

David Scott Mustaine (La Mesa, 13 ad Setémbar dal 1961) 'l è 'n cantànt e chitarìsta heavy metal americàṅ, leader dal grup thrash metal di Megadeth.

Cgnusû anc p'r èsar stâ al chitarìsta sulìsta fundadōr di Metallica, 'l è stâ mandâ via dal grup califurgnàṅ in dal 1983 par di scas cun ch'i àtar mémbar ma pò 'l à dâ vita in cal mèntar a i Megadeth, banda in dua lì lò 'l è 'l ùnic cumpunènt fis.

La sò infànsia

Mustaine al nas da na famìja cun di bèsi, cun un pàdar impiegâ in banca e na màdar ch'la fava la dóna ad servìsi. La sò infànsia però l'è stada dasfurtunàda a basta anc parchè sò pàdar 'l iva pardû al sò pòst ad lavōr e 'l iva tacâ a bévar, dvintànd manésc. Quànd Dave al gh'iva sōl sèt an, sò màdar, a n psénd-an piò, la s dìvid da sò marè ch'al murirà pò dòp soquànt an.

Dave, par tiràr-as sù, al taca a sunàr la chitàra ch'al s éra tòlt miténd da part i sò prim bèsi. Par far-'s i òs, al sunàva al strumènt tgnénd a drē a di disc ad sò surèla, in particulàr a quéi ad Cat Stevens, un muśicìsta che lò al tgniva dimóndi in cunsiderasiòṅ. Cun al pasàr dal tèmp però i sò gust i sa spòstan vèrs al rock cuma quél 'd Alice Cooper, un persunàǵ che Dave al dirà, in n'intervìsta in dal prugràma VH1 Behind the Music dal 2001, ch'l éra dvintâ al sò "padrèṅ". La pasiòṅ p'r al rock dûr e 'l heavy metal la crés sèmpar da piò man mâṅ che lò al scólta di grup quài Motörhead, Black Sabbath, Iron Maiden, AC/DC, o anc al punk di Sex Pistols o al rock britànic di Queen e Led Zeppelin.

Da śuvnòt, par via di brut fat ch'l iva patî da pìcul ch'i 'l ìvan fat dvintàr un baghét "difìcil", Mustaine 'l andàva da spés in di pustàs dal Sud dla Califòrgna par dar via la dròga. A quind'ś an 'l iva muciâ un caràtar arvèrs, rabî e lunàtic e 'l iva anc tacâ a bévar ma in cal mèntar 'l éra dvintâ anc òṅ di chitàrista più brâv dal sò bandi.

Discugrafìa

braṅ fat cun i Metallica

The Four Horsemen (mùśichi dla canta ciamàda in alóra The Mechanix)
Jump in the Fire (mùśichi e tèst)
Phantom Lord (mùśichi e tèst)
Metal Militia (mùśichi e tèst)
Ride the Lightning (mùśichi)
The Call of Ktulu (mùśichi)
Leper Messiah (mùśichi, a sò dita, ma i Metallica i n èṅ briśa 'd acòrd)

cun i Megadeth

1985 - Killing Is My Business... And Business Is Good!
1986 - Peace Sells... But Who's Buying?
1988 - So Far, So Good... So What!
1990 - Rust in Peace
1992 - Countdown to Extinction
1994 - Youthanasia
1995 - Hidden Treasures cover
1997 - Cryptic Writings
1999 - Risk
2000 - Capitol Punishment: The Megadeth Years racòlta
2001 - The World Needs a Hero
2002 - Rude Awakening dal viṿ
2002 - Still Alive...And Well? racòlta
2004 - The System Has Failed
2005 - Greatest Hits racòlta
2007 - United Abominations
2009 - Endgame
2011 - Th1rt3en