C'l artìcul chè 'l è scrit in Miranduléś Emiliàn

The Dancer Upstairs
Danza di sangue

Botto e Bardem in na figùra dal film
Dansa 'd sangṿ
2002
Regìa: John Malkovich
Scritōr: Nicholas Shakespeare
Atōr: Javier BardemAlexandra Lencastre
Juan Diego BottoLaura MoranteOliver Cotton
Elvira MínguezXabier ElorriagaLam Chuen
Natalia DicentaJavier ManriqueTito García
Luís Miguel CintraWolframio SinuéAbel Folk
Müsica: Alberto Iglesias
Léngua: IngléśSpagnōlQuechuaCinéś
Dürä dal film: 132 minüt
Nasiōṅ: Stat UnîSpaggna


«
Un galantóm insaplâ in un mónd ad tragatèṅ, putēr e pasiòṅ.»
(Tagline dal film)


Danza di sangue (Dansa 'd sangṿ) 'l è 'n thriller dramàtic americàṅ e spagnōl dal 2002 ad John Malkovich, chè a 'l sò debùt da regìsta. Al film, trat da 'n rumànś ad Nicholas Shakespeare intitulâ „The Dancer Upstairs“, al tōś ispirasiòṅ da 'l arvòlta mauìsta in Perù dal grup ad Sintēr Luminóś cmandâ p'r Abimael Guzmán.

La pelìcula, giràda in Ecuadōr, in Purtugàl e a Madrìd, l'è stada preśentàda a 'l 59śum Fèstival ad Venèsia e a 'l Sundance Film Festival. In tut l'à fat sù pôc da piò ad sinc migliòṅ e mèś ad dòlar.

Sunt

Agustín Rejas (Javier Bardem), na vòlta avucàt, adès al fà 'l agìnt ad pulisìa in un paéś dl'Amèrica dal Sud. 'L è spuśa cun la Sylvina (Alexandra Lencastre) e 'l gh'à na baghéta ad nóm Laura (Marie-Anne Berganza) ch'la stùdia balét a scóla da la sò insgnànta Yolanda (Laura Morante).

Insém a i sò jutànt Sucre (Juan Diego Botto), la Llosa (Elvira Mínguez) e Clorindo (Javier Manrique) Agustín al gh'à abû 'l incàrag da 'l generàł Merino (Oliver Cotton) ad catàr al cap dn'urganiśasiòṅ rivulusiunària, un sèrt “Ezequiel” (Abel Folk), ch'al pòrta avànti 'l pinsēr ad Mao Zedong c'n al catìvi. A 'l inìsi al grup cumunìsta al s limitàva a impicàr di caṅ in gir, atàc a di lampiòṅ par strada, cun di cartèi ad prupagànda adòs ma pò 'l è pasâ a di atentâ dinamitàri, druànd anc di baghét, e a masàr di pulisiòt, di óm dal stat, di pulìtig e di pruprietàri 'd sit ad tèra.

Quànd i tàc'n a murìr anc di minìstar, al presidènt al dà inìsi a la léǵ marsiàla in dal stat.

Culegamènt estéran