Contamination - Alien arriva sulla terra
|
C'l artìcul chè 'l è scrit in
Miranduléś |
 Contamination -Alien arriva sulla terra | ||
 La Louise Marleau in na figùra dal film | ||
| Cuntaminasiòṅ - Alien al riva su la tèra 1980 | ||
|---|---|---|
| Regìa: Luigi Cozzi | ||
| Scritōr: Luigi Cozzi • Erich Tomek | ||
| Atōr: Ian McCulloch • Marino Masè • Gisela Hahn Louise Marleau • Siegfried Rauch • Carlo Monni Carlo De Mejo • Ettore Martini • Angelo Ragusa | ||
| Müsica: Goblin | ||
| Léngua: Itagliàṅ | ||
| Dürä dal film: 95 minüt | ||
| Nasiōṅ: Itàglia • Germàgna Òvest | ||
Contamination - Alien arriva sulla terra (Cuntaminasiòṅ - Alien al riva su la tèra) 'l è 'n film ad scarésa itagliàṅ e tedésc dal 1980 ad Luigi Cozzi, cgnusû anc c'n i tìtui ad Alien arriva sulla Terra, Alien Contamination e Contamination.
'L è stâ girâ in òt stmani fra Róma, New York, la Culómbia e la Flòrida c'n un budget stimâ ad duśènt-vintsincmìla dòlar.
Sunt
Na naṿ c'n un càr'g ad cafè, vōda e bandunàda, l'è a la derìva darènt a 'l pòrt ad New York. Quànd 'n equipàǵ mandâ par vèdar cuś è sucès al riva lè, al cata di óm mòrt tut śbrandlâ e di óṿ vérd grôs cuma di balòṅ da fólbar. Tucànd-i a s véd ch'i sprìcan tut 'd intór'n un lìquid tòsic ch'al masa la gint faghénd-ag scupiàr al budèli.
La culunèla d'l eśèrcit americàṅ Stella Holmes (Louise Marleau) la pénsa subìt a na misiòṅ su Mart finìda mâł in dua 'n astrunàuta 'l éra sparî e 'n àtar, al cmandànt Ian Hubbard (Ian McCulloch), 'l iva patî 'n eśaurimènt narvóś par pò dvintàr 'n imbariagòs. La dóna la gh admànda 'd jutàr-la a far luś su 'l epiśòdi insém anc a 'l pulisiòt Tony Aris (Marino Masè).