Christine - La macchina infernale

C'l artìcul chè 'l è scrit in Miranduléś Emiliàn

Christine
Christine - La macchina infernale

L'Alexandra Paul in na figùra dal film
Christine - La màchina infernàla
1983
Regìa: John Carpenter
Scritōr: Stephen King • Bill Phillips
Atōr: William OstranderHarry Dean Stanton
John StockwellSteven TashRoberts Blossom
Alexandra PaulRobert ProskyMalcolm Danare
Kelly PrestonKeith GordonDavid Spielberg
Müsica: John CarpenterAlan Howarth
Léngua: Ingléś
Dürä dal film: 110 minüt
Nasiōṅ: Stat Unî


«
La gh'iva quèl ad sinìstar. L'éra nada in na scûra cadéna 'd muntàǵ. Christine. Na diabòlica Plymouth Fury dal '58. L'iva tòlt al cuntròl dal sò padròṅ śōvan, Arnie, e qvél da prima al n éra piò in vita par métar-'l in guàrdia. Adès la punta su la sōla parsòna ch'la s è misa in mèś, la Leigh, la muróśa 'd Arnie. L'atra dóna.»
(Tagline dal film)


Christine - La macchina infernale (Christine - La màchina infernàla) 'l è 'n film ad scarésa dal 1983 ad John Carpenter trat da 'l rumànś umònim ad Stephen King.

Custâ dagnóra déś migliòṅ ad dòlar, al film al 'n à pò purtâ a cà vint-i-òṅ.

Sunt

Detroit, 1957. 'N uperàj a la cadéna 'd muntàǵ al sa schisa tut i dî dna maṅ c'n al còfan dna màchina méntar 'n àtar, ch'l iva fat cascàr śò dla séndra su 'n sedìl ruinànd-al, al vèṅ cupâ c'n i gas ad scàrag da la màchina ch'la s éra arliàda sèg.

Rockbridge, Califòrgna, 12 ad Setémbar dal 1978. 'L imbranâ Arnie Cunningham (Keith Gordon) e 'l sò amìg mijór, Dennis Guilder (John Stockwell), i vàn'n a scóla ch'l è 'l prim dè par lōr. 'L an al taca dimóndi mâł parchè Arnie al i ciàpa da tri bui c'n a cap Buddy (William Ostrander) méntar Dennis al và in biànc cun na ragàsa. Chi grintèṅ là i vènan casâ via da la scóla e i giùr'n ad far-'g-la pagàr cara.

Mént'r al tórna a cà Arnie al buta 'l òć su na màchina rósa tuta scasàda, na Plymouth Fury dal '57, e al decìd ad cumpràr-la. Dòp avér-la giustàda al gh pasa tut al sò tèmp e soquànt dè dòp la màchina a pâr ch'la daga di ségn ad vita. Prima la manda a 'l uśdàł Dennis, ch'l iva cunsiliâ a Arnie 'd a n tōr-la briśa, pò la fà vgnir un spaj a la muróśa dal sò padròṅ, la Leigh (Alexandra Paul), in dal méntar ch'la magnàva e par pôc la n pèrd la vita parchè un cunsèṅ ad panèṅ al gh'armàgn ad travèrs. La ragàsa la taca a 'vér di dubi su la màchina e la vèṅ a savēr ch'al vèć pruprietàri al s éra tòlt la vita.

Culegamènt estéran