Chi ha ucciso i ragazzi di Atlanta?
|
C'l artìcul chè 'l è scrit in
Miranduléś |
 Who Killed Atlanta's Children?
| ||
| Chi ha ucciso i ragazzi di Atlanta? | ||
 Hines e Belushi in na figùra dal film | ||
| Chi è'l stâ a masàr i ragàs 'd Atlànta? 2000 | ||
|---|---|---|
| Regìa: Charles Robert Carner | ||
| Scritōr: Charles Robert Carner | ||
| Atōr: James Belushi • Gregory Hines • Sean Bell Sean McCann • Shawn Doyle • Kenneth Welsh Eugene Clark • Aidan Devine • Karen Robinson | ||
| Müsica: James Verboort | ||
| Léngua: Ingléś | ||
| Dürä dal film: 105 minüt | ||
| Nasiōṅ: Stat Unî • Germàgna | ||
Chi ha ucciso i ragazzi di Atlanta? (Chi è'l stâ a masàr i ragàs 'd Atlànta?) 'l è 'n film dramàtic dal 2000, fat par la televiśiòṅ, ad Charles Robert Carner ch'al 'l à anc scrit. Al cònta di fat sucès dabòṅ a Altànta in di an da 'l 1979 a 'l 1981 quànd vint-i-òt parsòni 'd culōr, dagnóra tut baghét o ragasōi, i èṅ stâ cupâ.
La pelìcula, vgnuda fóra anc cuma Echo of Murder o Unanswered Questions, l'è stada giràda a Turònt e a Stouffville in Cànada.
Sunt
Ron Larson (Gregory Hines) 'l è 'l diretōr dna rivìsta muśicàla 'd New York, Spin. Òṅ di sò giurnalìsta più pulèmic 'l è Pat Laughlin (James Belushi) ch'al gh l'à cun Bob Geldof e i sò evènt par l'Àfrica. Chi lò 'l è spuśâ cun la Sally (Debra Sharkey) e 'l gh'à na baghéta ch'la sòna 'l sibiōl.
Na sira a telèfuna in redasiòṅ la deputàda dla Geòrgia Mildred Glover (Lynda Gravatt) par dmandàr a Larson 'd andàr-'g a fónd su 'l caś di masamènt seriài 'd ragàs négar 'd Altànta parchè la pulisìa l'à mis dènt'r un sèrt William Kunstler (Kenneth Welsh) ma par lē a gh'è quèl ch'a traśa. Al diretōr al partìs subìt par Dixie Land insém a Pat p'r intervistàr i parènt dal vitmi e la sgnōra Lois Evans (Karen Robinson) la cònta che par lē 'l cadàvar ch'i gh'aṅ fat védar al n éra briśa qvél ad sò fiōl, anc la Willie Mae Mathis (Quancetia Hamilton) la gh'à di dubi su 'l schéltar catâ dal sò Jeffries. La Mildred la gh fà savēr che soquànt ragàs pòvar ad qvi lè masâ i éran finî in dal gir dla prustitusiòṅ par di pulìtig dal pòst.
P'r i dū giurnalìsta a s pōl dar ch'i gh sìan insaplâ qvéi dal Ku Klux Klan stand a 'n dossier ch'al gh'à dâ 'n sèrt Aubrey Melton (Sean McCann), vèć agìnt dal repàrt 'd investigasiòṅ dal stat ch'al s è dimìs parchè 'l sò cap, Jack Johnson (Aidan Devine), òṅ ch'al gh'à 'l brut visi 'd tgnir sèmp'r un stecadènt fra i làbar, 'l iva fat da tut par quaciàr i respunsàbii e la véra. Par far-as dar 'l indirìs ad Melton da l'impiegàda dal cumùn, Ron al fà finta 'd ès'r òṅ dal pòst miténd-as na salopette 'd jeans su maja biànca a mandghi curti, brét in cô c'n insìma la scrita southern pride e dascurénd cun 'n asènt sudìsta dimóndi ma dimóndi péś.