Champagne per due dopo il funerale
|
C'l artìcul chè 'l è scrit in
Miranduléś |
 Endless Night
| ||
| Champagne per due dopo il funerale | ||
 Bennett e l'Hayley Mills in na figùra dal film | ||
| Champagne par dū dòp al funeràł 1972 | ||
|---|---|---|
| Regìa: Sidney Gilliat | ||
| Scritōr: Agatha Christie • Sidney Gilliat | ||
| Atōr: Hywel Bennett • Hayley Mills • Ann Way Britt Ekland • Per Oscarsson • George Sanders Aubrey Richards • Peter Bowles • Madge Ryan | ||
| Müsica: Bernard Herrmann | ||
| Léngua: Ingléś | ||
| Dürä dal film: 99 minüt | ||
| Nasiōṅ: Régn Unî | ||
Champagne per due dopo il funerale (Champagne par dū dòp al funeràł) 'l è 'n śal ingléś dal 1972 ad Sidney Gilliat trat da 'l rumànś Nella mia fine è il mio principio dal 1967 dl'Agatha Christie.
Al film al n gh'à minga abû al sucès sprâ tant ch'al n è minga stâ distribuî in di Stat Unî. Anc l'Agatha Christie la n è minga stada dal tut sudisfàta dla realiśasiòṅ finàla 'd òṅ di sò rumànś preferî anc s'l'éra stada pò 'd acòrd cun la sarnìda dal regìsta e dal cast, dimóndi manc dal séni ad nûd dla Ekland.
Sunt
Mike Rogers (Hywel Bennett) 'l è 'n śōvan buletàri ch'al fà 'l scarusadōr ad mistēr anc s'a 'l lavōr a gh piàś da piò 'l art e 'l ròbi antìghi tant ch'al fà fadìga a tgnir-'s-al stric. Difàti un dè al vèṅ licensiâ p'r avér fat un brut sarvìsi a di turìsta americàṅ in Ulànda. Prima incóra 'l iva cgnusû a Milàṅ 'l archistar Santonix (Per Oscarsson), 'n óm malâ ch'al gh'à i dè cuntâ, e sèg 'l iva dascōrs 'd un prugèt ad far na vila in un sit dal sud dl'Inghiltèra davśèṅ a la còsta dal Devon cgnusû cuma “al camp dla sigàgna”, un pòst mis in véndida dòp ch'i vèć pruprietàri, i Townsend, i èṅ tut mòrt. Ma 'l è sōl un sógn parchè al n gh'à minga bèsi, specialmènt da quànd par tiràr avànti al s è mis a far al dipendènt 'd un benśinàr.
Na matìna Mike al véd balàr in dal camp dla sigàgna na bèla ragàsa biónda, la Fenella Thomsen dita Ellie (Hayley Mills), na śōvna ch'la gh'à da cómpiar daśdòt an e ch'l'è anc una dal dóni più richi dal mónd esénd ch'i sò genitōr i gh'aṅ lasâ incòsa. I dū i s inamóran e i sa spóśan anc s'i sò parènt, i sîṅ Frank (David Bauer) e la Beth (Helen Horton) e pò la Cora Walker (Lois Maxwell) e sò marè Reuben (Peter Bowles) ch'al scumét a i cavài, i gh dàṅ cóntar. La màd'r ad Mike (Madge Ryan) la vèṅ a savēr dal matrimòni sōl par létra.
L’Ellie la cómpra 'l camp dla sigàgna e la gh fà tiràr sù na vila da 'l architét Santonix p'r andàr-'g a star insém a sò marè. Par lò la tōś anc un negòsi 'd antiquàri. Al ròbi i pàr'n andàr a la granda in fiṅ tant ch'a n riva lè la Greta (Britt Ekland), na vècia amìga tedésca dl’Ellie ch'la vōl far sèmpar qvél ch'la vōl lē. Un dè l’Ellie la vèṅ catàda mòrta e 'l dutōr Philpott (Aubrey Richards) al diś ch'a gh'è vgnû 'n cōlp méntar l'andàva a cavàl. Ma pò a riva na létra in dua a gh'è na foto ad Mike e dla Greta insém in Ulànda prima che lò al cgnusìs sò mujér.