Cassandra crossing
|
C'l artìcul chè 'l è scrit in
Miranduléś |
 Cassandra crossing
| ||
 Martin Sheen e l'Ava Gardner in na figùra dal film | ||
| Al pasàǵ dla Casàndra 1976 | ||
|---|---|---|
| Regìa: George Pan Cosmatos | ||
| Scritōr: George Pan Cosmatos Robert Katz • Tom Mankiewicz | ||
| Atōr: Richard Harris • Sophia Loren • Ann Turkel Ava Gardner • Burt Lancaster • Ingrid Thulin Orenthal James Simpson • John Phillip Law Lionel Stander • Alida Valli • Ray Lovelock Martin Sheen • Lee Strasberg • Lou Castel Stefano Patrizi • Thomas Hunter • Fausta Avelli | ||
| Müsica: Jerry Goldsmith | ||
| Léngua: Itagliàṅ • Ingléś • Tedésc • Śvedéś | ||
| Dürä dal film: 111 minüt | ||
| Nasiōṅ: Régn Unî • Itàglia • Germàgna | ||
Cassandra crossing (Al pasàǵ dla Casàndra) 'l è 'n film catastròfic dal 1976 ad George Pan Cosmatos trat da 'n rumànś ad Robert Katz e ambintâ insìma a 'n trêṅ ch'al viàśa par l'Europa. Al film 'l è prudót par Carlo Ponti, marè dla Sophia Loren che chè l'è prutagunìsta insém a Richard Harris.
Al pònt druâ p'r al ripréśi 'l è al Viaduc de Garabit, in di mònt sentrài francéś.
Sunt
Tri terurìsta śvedéś i gh la càvan a 'ndàr dèntar cun la fòrsa a di laburatòri dl'Urganiśasiòṅ Mundiàla dla Salùt a Ginévra par mét'r-ag dal bómbi ma i vînan farmâ da na guàrdia ch'la in masa òṅ prima ad ciamàr la sicurésa. Chi àtar dū i scàpan via e i finìsan in un laburatòri in dua i s fànan di esperimènt su di vìrus nóṿ. I partìsan dal sćiuptàdi ch'i śbràgan di vēdar e òṅ di lōr dū, prima ad tajàr la còrda, al s bèca acsè un brut mâl. A fadìga chi lò al gh la cava a tōr un trêṅ dirèt a Stucólma i du i viàśan anc al dutōr Jonathan Chamberlain (Richard Harris) e la sò vècia mujēr Jennifer Rispoli (Sophia Loren), la Nicole Dressler (Ava Gardner), mujēr 'd un vendidōr 'd armi tedésc, e al sò amànt più śōvan Robby Navarro (Martin Sheen), ch'al fà di bèsi vindénd dla dròga. In sal trêṅ a gh'è anc un prēt (Orenthal James Simpson) che però 'l è invéci 'n pulisiòt ch'al gh dà la casa.
Al terurìsta al mōr in pôchi óri, al fà sōl in tèmp a pasàr al sò mâł a chi àtar viaśadōr. A Ginévra la Dr. Elena Stradner (Ingrid Thulin) la próa in cal mént'r a catàr na cura ma 'l culunèl americàṅ Stephen Mackenzie (Burt Lancaster) al s dà da far par mét'r-i in quaranténa, sarànd-i tut dènt'r a i vagòṅ a la stasiòṅ ad Nurimbèrga. Ma qvél ch'al gh'à in mènt, par métar a taśēr incòśa, 'l è spavintōś: far andàr al trêṅ in Pulògna pasànd p'r al pònt scasâ e dastrùt ad Cassandra crossing, in manéra da far-i murìr tut quànd al trêṅ al gh pasarà insìma.
A taca acsè na guèra fra la pulisìa e i viaśadōr ch'i vrévan farmàr al trêṅ, anc parchè in cal méntar a s è vgnû a savēr che 'l usìgen al cumbàt bèṅ cla pèsta lè.
A la fiṅ, anc par via dal sacrifìsi d'l ebrèi Herman Kaplan (Lee Strasberg), ch'al s fà saltàr p'r ària par scavśàr in dū al trêṅ, qvéi dla prima clas i scàmpan méntar chi àtar i finìsan śò da 'l pònt catànd tut la mòrt, spaplànd-as e bruśànd viṿ.