Candyman - Terrore dietro lo specchio
|
C'l artìcul chè 'l è scrit in
Miranduléś |
 Candyman
| ||
| Candyman - Terrore dietro lo specchio | ||
 La Virginia Madsen in na figùra dal film | ||
| Candyman - Terōr da drē da 'l spèć 1992 | ||
|---|---|---|
| Regìa: Bernard Rose | ||
| Scritōr: Clive Barker | ||
| Atōr: Virginia Madsen • Tony Todd • Ted Raimi Vanessa Williams • Xander Berkeley • Ria Pavia Michael Culkin • Kasi Lemmons • DeJuan Guy Eric Edwards • Mark Daniels • Marianna Elliott | ||
| Müsica: Philip Glass | ||
| Léngua: Ingléś | ||
| Dürä dal film: 99 minüt | ||
| Nasiōṅ: Stat Unî | ||
Candyman - Terrore dietro lo specchio (Candyman - Terōr da drē da 'l spèć) 'l è 'n film ad scarésa americàṅ dal 1992 ad Bernard Rose trat da 'l racònt The Forbidden ad Clive Barker. Al gh'à abû dū séguit: L'inferno nello specchio (Candyman 2) dal 1995 e Candyman - Il giorno della morte dal 1999. 'L è stâ girâ in Inghiltèra e in di Stat Unî, specialmènt a Chicago.
Custâ òt migliòṅ ad dòlar a 'l incìrca, al film al 'n à pò purtâ a cà da piò ad vint-sinc.
Sunt
L’Helen Lyle (Virginia Madsen) l'è na studènta dl'università ch'la pòrt' avànti di studi dal tradisiòṅ di tèmp 'd al dè 'd incō. Méntar l'è drē a far dal dmandi a di ragàs dascurénd dal superstisiòṅ, la vèṅ a cgnusénsa dna legénda ligàda a 'l persunàǵ ad Candyman (Tony Todd). Chi lò 'l éra 'n négar ad nóm Daniel fiōl 'd un séruv dla Luiśiàna. P'r al fat ch'al fus anc brâv a dipìnśar, 'n óm pîn ad bèsi e pruprietàri ad dimóndi fónd al 'l iva ciamâ par far 'n artràt a sò fiōla Caroline ma pò al ròbi i aṅ tòlt na piga difarénta, c'n i dū śōvan ch'i èṅ dvintâ amànt e lē gravda. Un quèl dal gènar a n psiva minga èsar pardunâ: tut al paéś al s éra mis a dar-'g adòs turturànd-al e tajànd-ag via na maṅ c'n un śghét ruśnènt. Impinî pò ad mēl, 'l è stâ lasâ murìr sóta soquànti bréschi, quaciâ da 'n sam ad béghi rabìdi. A s cònta che na parsòna, guardànd-'ś in un spèć e dgénd par sinc vòlti al sò nóm, la sarés bòna 'd arciamàr da 'l nòstri bandi “Candyman”, ch'adès al gh'arév 'n anśinèl a 'l pòst dla maṅ, ma a cóst dla vita.
Dòp ès'r andàda in dal pòst in dua Daniel 'l éra stâ cupâ in alóra, ciamâ Cabrini-Green, e avér-al ciamâ da drē da 'n spèć, dla gint la taca a pèrdar la vita. Al brut 'l è ch'la pulisìa la créd ch'la sia stada pròpria l’Helen a masàr-i.