Bounce (film)
|
C'l artìcul chè 'l è scrit in
Miranduléś |
 Bounce
| ||
| Bounce | ||
 La Gwyneth Paltrow e Affleck in na figùra dal film | ||
| A 'l impruvìś 2000 | ||
|---|---|---|
| Regìa: Don Roos | ||
| Scritōr: Don Roos | ||
| Atōr: Ben Affleck • Gwyneth Paltrow • Jeff Garlin Tony Goldwyn • Natasha Henstridge • Joe Morton Johnny Galecki • Caroline Aaron • Jennifer Grey | ||
| Müsica: Mychael Danna | ||
| Léngua: Ingléś | ||
| Dürä dal film: 106 minüt | ||
| Nasiōṅ: Stat Unî | ||
Bounce (A 'l impruvìś) 'l è 'n film dramàtic americàṅ dal 2000 ad Don Roos ch'al 'l à anc scrit. In dla culòna sunóra i s càtan di pès dla Dido (Here With Me), di Massive Attack (Be Thankful (For What You've Got)), dla Beth Orton (Central Reservation) e àt'r incóra.
'L è custâ trénta-sinc migliòṅ ad dòlar ma al 'n à purtâ pò a cà da piò ad sinquànta-tri.
Sunt
Buddy Amaral (Ben Affleck) 'l è 'n śuvnòt put ad sucès ch'al lavóra in dal camp dla reclàm. Dòp avér firmâ 'n cuntràt cun la cumpagnìa Infinity, al śōvan 'l àrmagn blucâ a 'l aeropòrt par via dna timpèsta 'd néṿ. Al cgnós acsè na bèla biónda ad Dallas ch'la lavóra lè, la Mimi (Natasha Henstridge), e Greg Janello (Tony Goldwyn) ch'al gh cònta che a Los Angeles al gh'à na mujér, l’Abby (Gwyneth Paltrow), e dū fiōi, Scott (Alex D. Linz) e Joey (David Dorfman), ch'i 'l aspét'n a cà par festegiàr al Nadâł. Purtròp lò 'l è dagnóra sèmpar via par lavōr e adès i gh'aṅ scanślâ anc al vōl. Buddy, ch'al gh'à 'n bijét p'r al vōl sucesìṿ, al decìd ad far na bòna asiòṅ e al gh al rigàla anc parchè acsè al gh'à la manéra ad farmàr-'s in hutèl par gusàr-as la Mimi.
Al dè dòp, quànd al s déśda, Buddy al sènt in televiśiòṅ ch'l'è sucèsa na daśgàsia: 'l aparéć ch'al gh'iva da tōr lò 'l è vgnû śò e a n s è salvâ ninsòṅ. 'L è 'n pēś tròp grand par lò ch'al taca acsè a bévar par daśmindgàr.
'N an dòp 'l incidènt, e dòp un perìud in clìnica, Buddy al decìd ad partìr par cgnósar la védva. Quànd la 'l incróśa al n gh cònta gnint ma al taca a jutàr-la in dal sò lavōr 'd agìnta ch'la vénd dal cà. A finìs però ch'i dū i s inamóran e Buddy al pasa 'n fiṅ ad stmana c'n i sò fiōi a 'n parc aquàtic. In cal méntar la Mimi la cata na caséta in du a s véd Greg in di sò ultmi óri 'd vita. Cardénd ad far-'g un piaśēr, la dóna la la pòrta da l’Abby par far-ag védar quànd al gh vliva bèṅ.
Quànd l’Abby la la mét sù la véd sò marè dascórar cun Buddy, cun lò ch'al gh śibìs al sò bijét.