Bloody Psycho
|
C'l artìcul chè 'l è scrit in
Miranduléś |
 Bloody Psycho
| ||
 La Brigitte Christensen in na figùra dal film | ||
| id. 1989 | ||
|---|---|---|
| Regìa: Leandro Lucchetti | ||
| Scritōr: Giovanni Simonelli • Leandro Lucchetti | ||
| Atōr: Peter Hintz • Loes Kamma • Sacha Darwin Brigitte Christensen • Nubia Martini • Annie Cerreto Vassili Karis • Louise Kamsteeg • Marco Di Stefano | ||
| Müsica: Lanfranco Perini | ||
| Léngua: Itagliàṅ | ||
| Dürä dal film: 85 minüt | ||
| Nasiōṅ: Itàglia | ||
Bloody Psycho (cgnusû anc cuma Bloody Psycho - Lo specchio o Nel nido del serpente) 'l è 'n film ad scarésa dal 1989 ad Leandro Lucchetti, preśentâ par Lucio Fulci e prudót par la televiśiòṅ.
Soquànti parti ad cal film chè i ś véd'n anc in dla pelìcula Un gatto nel cervello ad Lucio Fulci dal 1990.
Sunt
La sgnóra Rezzori (Brigitte Christensen), na dóna nòbla e pîna 'd bèsi, la gh'à 'n prubléma: da quànd l'à patî 'n incidènt in strada l'è custréta a vìv'r in sna scrana a rudèli. Par sintìr manc mâł la decìd ad far-as far di sfrēg da 'l dutōr Werner Voegler (Peter Hintz), al più braṿ in dal sò camp di nòstar tèmp e pò 'l è anc un pò medium. La dóna la s fà sarvìr da na camaréra sò amànta ch'la lavóra in cà cun na plisa adòs, la Simona (Nubia Martini). La padròna 'd cà la la trata pròpria da schiva tant che quànd al mèdag al riva lè, dòp ch'un barbòṅ (Vassili Karis) al 'l à mis in guàdia cuntànd-ag ch'al castèl futû in du 'l è drē andàr 'l è maladî, lē la śbat par tèra la sò tasìna da thè par pò urdnàr a la Simona ad catàr sù tut i pès. Quànd la véd che lē la s piga e basta la gh siga adrē dgénd: «Mo quànti vòlti a gh'ò da dir-'t-al ch'al pulisìi i vànan fati in śnòć!? Mét-at śò, cuma na rója!».
Werner al và a lèt cun la sgnóra Rezzori e pò anc cun na sò parènta più śōvna, la Micaela (Loes Kamma), ch'l à cgnusû in un manéś. In cal méntar na vècia marsa e mumificàda in scrana a rudèli la cópa prima 'l avucàt Cohen (Paul Muller) e pò anc sò mujér Mary (Annie Cerreto) ch'la vliva cuntàr quèl a Werner dand-ag apuntamènt davśèṅ a 'n lavadōr.