Anna Karolína Schmiedlová
|
C'l artìcul chè 'l è scrit in
Miranduléś |
L’Anna Karolína Schmiedlová (Košice, 13 ad Setémbar dal 1994) l'è na tenìsta śluvàca prufesiunìsta da 'l 2011. L'è élta 176 cm e la péśa 63 chilo. Al 13 'd Avrìl dal 2015 l'è rivàda a èsar la nùmar quarànta-siē dal mónd.
In dla sò caréra l'à vins un tìtul WTA e nóṿ ad qvéi d'l ITF.
Caréra
La śluvàca la taca a pistàr i camp da tènis dal sircùit ITF in dal 2010, pò in dal 2011 la vins al sò prim tìtul da déś-mila dòlar in Armègna. In dal 2012 la in mùcia sù quàt'r ad fila, 'l ùltim un vintsìnc-mila dòlar a Brésa pasànd p'r al qualificasiòṅ. A la fiṅ d'l an la và in finàł in àtar dū ITF ad vintsìnc-mila dòlar vinsén-an òṅ in Iśraēl.
In dal 2013 la s qualìfica p'r al turnèo WTA ad Katowice e lè la bat l'Alizé Cornet par 6-3 6-0 prima 'd céd'r a la Petra Martić. In Primavéra la vins 'l ITF ad Sivitavècia baténd la Gioia Barbieri in semifinàl par 6-1 7-5 e pò la Magda Linette in finàl par 6-0 6-1. In Maǵ la s qualìfica p'r al Roland Garros, pò la bat anc la Yanina Wickmayer prima 'd lasàr strada a la Jamie Hampton. In Agóst la pasa 'l qualificasiòṅ a New Haven c'n un 7-6 6-2 a l'Elina Svitolina ma pò la pèrd subìt cun la Sloane Stephens in dū sét. A Ningbo la riva in di quàrt par via di sucès cun la Karolína Plíšková e cun la Vesna Dolonc, pò la pèrd cun la Bojana Jovanovski. La sèra 'l an a la puśisiòṅ 74 dal mónd.
In dal 2014 la tōś part a soquànt turnèo WTA ma la fà sù sōl di prim e di secónd tùran. In Mars la s mét in bisàca 'l ITF da sinquànta-mila dòlar 'd Osprey baténd in finàl la Marina Eraković par 6-2 6-3. In Maǵ la śōga atri dū finàli a Trnava e a Praga vinsénd cun la Barbora Záhlavová-Strýcová in Śluvàchia e pardénd cun l'Heather Watson in Repùblica céca. A 'l Roland Garros la bat la Jie Zheng e pò anc la Venus Williams prima ad dar via libra a la Garbiñe Muguruza Blanco. Invéci ad ciapàr al vōl, la śluvàca la ś blòca andànd sémpar fóra a 'l prim tùr'n a Birmingham, Wimbledon, Bùcarest, Båstad, US Open, Hong Kong e Seùl e a n qualificànd-as minga a Eastbourne, Cincinnati, New Haven e Wuhan. La tórna a vìns'r un incónt'r a Linz (7-6 6-4 a l'Annika Beck) ma pò la céd a la Stefanie Vögele a 'l secónd tùran. La finìs 'l an pardénd da la Francesca Schiavone a Limoges.
_(9720876294).jpg)
In dal 2015 la Schmiedlová la pèrd p'r un pēl, 6-3 2-6 6-8, a 'l secónd tùran di Australian Open cun la Zarina Dijas. In sla tèra rósa 'd Rio de Janeiro invéci la riva par la prima vòlta in na finàl WTA ma la la pèrd cun la Sara Errani par 6-7 1-6. La fà mâł in sal cimènt cun tri prim tùr'n ad fila a Acapûlc (2-6 1-6 da l'Aleksandra Krunić), a Monterrey (6-4 3-6 0-6 da l'Anastasija Pavljučenkova) e a Indian Wells (2-6 2-6 da la Lauren Davis). Dòp un secónd tùr'n a Miami (4-6 5-7 da l'Agnieszka Radwańska) la và in Pulògna e la vins a Katowice baténd l'Alizé Cornet in di quàrt par 6-2 6-0, l'Alison Van Uytvanck in semifinàl par 6-4 6-1 e la Camila Giorgi in finàl par 6-4 6-3. La śluvàca la gh la cava acsè a finìr par la prima vòlta fra 'l primi sinquànta śugadōri a 'l mónd.