Angeli e insetti
|
C'l artìcul chè 'l è scrit in
Miranduléś |
 Angels and Insects
| ||
| Angeli e insetti | ||
 La Kensit e Rylance in na figùra dal film | ||
| Àngii e insèt 1995 | ||
|---|---|---|
| Regìa: Philip Haas | ||
| Scritōr: A.S. Byatt • Belinda Haas • Philip Haas | ||
| Atōr: Mark Rylance • Kristin Scott Thomas Patsy Kensit • Jeremy Kemp • Douglas Henshall Annette Badland • Chris Larkin • Anna Massey | ||
| Müsica: Alexander Balanescu | ||
| Léngua: Ingléś | ||
| Dürä dal film: 116 minüt | ||
| Nasiōṅ: Régn Unî • Stat Unî | ||
Angeli e insetti (Àngii e insèt) 'l è 'n drama rumàntic ingléś e americàṅ dal 1995 ad Philip Haas, candidâ a i Prèmi Òscar p'r i custùm 'd Paul Brown.
La pelìcula, preśentàda in cuncōrs a 'l 48śum Fèstival ad Cannes, l'è trata da la nuvèla Morpho Eugenia dl'Antonia S. Byatt e l'à fat sù tri migliòṅ e quàt'r ad dòlar.
Sunt
Durànt i an vituriàṅ dal XIX sécul, al naturalìsta e entumòlug William Adamson (Mark Rylance), dòp un viàś in Amaśògna e 'n naufràgi ch'al gh'à fat pèrd'r incòśa, al tórna in Inghiltèra par lauràr in dal pudēr ad Sir Harold Alabaster (Jeremy Kemp), un sgnōr pîṅ ad bèsi ch'al gh'à da catalugàr la sò culesiòṅ ad parpàj e ch'al gh'à biśógn 'd un mìstar p'r insgnàr al siénsi a i putèṅ dla sò rasa, laurànd insém a la badànta Matty Crompton (Kristin Scott Thomas).
'L óm al s inamóra dla fiōla più granda ad Sir Harold, l’Eugenia (Patsy Kensit), na śōvna ch'l'è armàśa dimóndi squasàda da la mòrt dal sò muróś. Fra i dū a scròca la mòla dla pasiòṅ e i decìd'n acsè ad spuśàr-'s anc s'al fradèl milurdèṅ, śnòb e visiâ dla spóśa, Edgar (Douglas Henshall), al n è pròpria minga 'd acòrd.
In dal cōrs di an l’Eugenia la dà a la luś sinc fiōi, dand al nóm Edgar a 'l prim masć nâ cuma da tradisiòṅ dla caśàda, ma 'l sò cumpurtamènt 'l è dimóndi strâṅ parchè la gh'à di perìud ad pasiòṅ e di àtar in du la s tîṅ dastacàda, srand-'s a ciàṿ in dla sò cambra. In cal méntar William al s pasa 'l tèmp jutànd la Matty, ch'la gh'à na culògna 'd furmìghi in cà, in na téca 'd vēdar, a scrìv'r un lìbar su chi insèt lè esénd la dóna dimóndi brava a far di diségn da druàr cuma figùri in dal tèst.
Un dè William, ch'l éra a casa, al vîṅ ciamâ a cà da 'n séruv ch'al gh diś che l’Eugenia la 'l pésca. Quànd 'l entumòlug al vèra 'l us dla sò cambra al gh'à però na bruta surpréśa.