Al Butèighi (Abinèa)

Cl' artécol ché l' è scrét in Arzân

Al Butèighi (Botteghe in italiân) l'é 'na frasiòun dal cmûn 'd Albinèa, in pruvîncia ed Rèz. L'é a matèina e a 1 chilômeter dal center dal paèiş in sém a la strêda pruvincêla SP21; in sém a la rîva dréta dal turèint Cròstel e a i pē dal prémi culèini ed l' Apenèin arzân. Cgnusûda anca cme "al Cantòun", fîn a j ân '40 dal '900 an n' ēra êter che un cruşîl tra la strêda che da Sân Pôl la và a Scandiân e l' antîga strêda ch' la pôrta a la Pēv 'd Albinèa. Int al Butèighi a gh'é anca al burghêdi ed Casòun, Fònd Ôca, Parēt ed Sōver e Parēt ed Sòta.

Monumèint

Sibèin che la frasiòun l'é fâta sōl ed cà privêdi e da vilèti in fíla fâti da pôch, al Butèighi a gh'àn int al teritôri ûn di monumèint pió impurtânt dal patrimòni artéstich albinetân e pruvincêl: la Pēv 'd Albinèa. Tirêda só int al peréiod préma ed còl rumân, la vîn citêda int al famōş avîş, dal 14 otòber 980, 'd Ottone II, in dó, tra chiêter, a vîn numinê per la préma vôlta int la stôria al nòm 'd Albinèa, la Pēv apèina fâta la vîn dedichêda a Sân Prôsper, per pó tōr per sèimper al nòm ed la Bêata Vêrgin. Intōren al 1517 a vîn urdên al zōven Antonio Allegri ciamê al Correggio un quêder per la Pēv, pasê a la stôria cun al nòm ed Madonna di Albinea, pó regalêda, int al 1657, al nōv imperadōr Leopoldo I dal dóca Alfonso IV d'Este e pó misteriōşamèint sparîda. La cēşa l'é stêda quêşi arfâta int al 1671. L'êlta e slansêda tòra dal campâni l'é stêda arfâta dôp dal taramôt dal 1832 ch' a l'à zachêda per tèra. Dal piasêl ch' a gh'é davânti a 's pōl amirêr 'na lêrga vésta ch' la brâsa tóta la Pianûra Padâna fîn a i prémi mûnt dal j Êlpi Lumbêrdi e Vèneti

Nôta: cla pâgina ché l'é stêda inviêda cun 'na tradusiòun da Botteghe (Albinea) trâta da it.wikipedia.org.
Guêrda la stôria ed la pâgina uriginêla per cgnòser l'elèinch 'd j autōr.