Accidental Love
|
C'l artìcul chè 'l è scrit in
Miranduléś |
 Accidental Love
| ||
 James Marsden in na figùra dal film | ||
| Amōr asidentàł 2015 | ||
|---|---|---|
| Regìa: David O. Russell | ||
| Scritōr: Matthew Silverstein Kristin Gore • Dave Jeser | ||
| Atōr: Jessica Biel • Jake Gyllenhaal • James Brolin Beverly D'Angelo • James Marsden • Tracy Morgan | ||
| Müsica: John Swihart | ||
| Léngua: Ingléś • Purtughéś | ||
| Dürä dal film: 100 minüt | ||
| Nasiōṅ: Stat Unî • Régn Unî | ||
Accidental Love (Amōr asidentàł) l'è na cumèdia americàna dal 2015 ad David O. Russell, firmàda cuma Stephen Greene.
A 'l inìsi, quànd i èṅ tacàdi 'l ripréśi in d'l Avrìl dal 2008, al film al gh'iva da ciamàr-as Nailed e al gh'iva da 'vēr-ag fra i prutagunìsta James Caan che però pò 'l à bandunâ 'l prugèt lung la via. In séguit la prudusiòṅ la gh'à abû dimóndi prubléma p'r al fat ch'al cast e la troupe i n éran briśa stâ pagâ. In dal Luj dal 2010, quànd al muntàǵ al n éra minga incóra terminâ, anc al regìsta 'l à tajâ la còrda tant ch'la pelìcula i 'l aṅ finìda di àtar. A film 'l à acsè vdû la luś sōl in dal 2015, in dal canàł di video on demand.
Custâ vint-siē migliòṅ ad dòlar e buciâ da i crìtic, al film al 'n à pò fat sù sōl sènt-trentanovmìla.
Sunt
L’Alice Eckle (Jessica Biel) l'è na śuvnòta d'l Indiàna ch'la lavóra in un fast food. I sò genitōr Bob (Steve Boles) e l’Helen (Beverly D'Angelo) i èṅ dimóndi cuntènt quànd al sò muróś pulisiòt Scott (James Marsden) al decìd finalmènt ad śibìr-ag 'l anèl ad fidansamènt invitànd-la fóra a séna in un risturànt itagliàṅ i du i fàn'n al famóśi fujàdi “Alfredo”.
Purtròp quànd i dū i èṅ là, a sucéd 'n incidènt. 'N uperàj al strabùca śò méntar 'l éra drē a giustàr na strutùra e cun la sò màchina spara-ciòld 'l insfìlsa 'n ciòld in dal crani dla pòvra ragàsa. Esénd che chi lē la n gh'à minga n'asicurasiòṅ par la salùt, i mèdag i n la òpran briśa, dgénd-ag ciàr e tónd ch'la và in a risć ad murìr o 'd avēr-ag di prubléma a dascórar o sinò, giusà, la prév anc dvintàr na purcùsa a lèt. Tant p'r armàgnar su 'l sicûr, Bob al gh tira via 'l anèl da 'l dî, vō't mó dir ch'la pòs' armàgn'r uféśa par sèmpar, a n s sà mai.
Cun 'l ajùt 'd un sò amìg ch'al gh'à 'l prubléma dal budèli ch'i gh vìnan fóra da 'l buś dal cûl, Keyshawn (Tracy Morgan), e 'd un prevòstar ch'al gh'à sèmp'r al cas dûr da quànd 'l à tòlt dal Viagra e dal Cialis, al reverénd Norm (Kurt Fuller), l’Alice la và a Washington par dmandàr a 'l mémbar dal cungrès dal sò bandi Howard Birdwell (Jake Gyllenhaal) ad pugiàr-la in dla sò batàja par na sanità pùblica.