8 Mile
|
C'l artìcul chè 'l è scrit in
Miranduléś |
 8 Mile
| ||
| 8 Mile | ||
 Eminem e la Kim Basinger in na figùra dal film | ||
| id. 2002 | ||
|---|---|---|
| Regìa: Curtis Hanson | ||
| Scritōr: Scott Silver | ||
| Atōr: Eminem • Kim Basinger • Mekhi Phifer Brittany Murphy • Evan Jones • Eugene Byrd | ||
| Müsica: Dr. Dre • Eminem • Jay-Z • Nas • Rakim Kid Rock • Xzibit • Tupac • Biggie • Mobb Depp Junior Mafia • Lynyrd Skynyrd • Wu Tang Clan Method Man • Show & AG • South Central Cartel | ||
| Léngua: Ingléś | ||
| Dürä dal film: 110 minüt | ||
| Nasiōṅ: Stat Unî • Germàgna | ||
8 Mile (id.) 'l è 'n film dramàtic e biugràfic dal 2002 ad Curtis Hanson ispirâ a la vita dal cantànt rapper Eminem prima ch'al dvintìs famóś. Pròpria lò 'l è 'l prutagunìsta dla pelìcula e la sò canta Lose Yourself, druàda in dla culòna sunóra dal film, al gh l'à cavàda a vìns'r al Prèmi Òscar.
Al film 'l à muciâ sù da piò ad duśènt-quarantadū migliòṅ ad dòlar esénd-an custâ quarànt'òṅ.
Sunt
La 8 Mile Road l'è na strada malfamàda 'd Detroit ch'la divìd al quartēr di biànc da qvél di négar. Jimmy Smith Jr. (Eminem), dit B-Rabbit, 'l è 'n śuvnòt biànc cun pôc bèsi in bisàca ch'al viṿ in na roulotte in dal quartēr di négar. Ad dè al lavóra in fàbrica ma la sò pasiòṅ l'è la mùśica hip-hop e lò al fà da tut par sfundàr in cal mónd lè. Purtròp in famìja al ròbi i n gìran minga p'r al vèrs giùst parchè sò màdar, la Stephanie Smith (Kim Basinger), l'è n'imbariagòsa ch'la s è misa cun 'n óm ch'al s arlìa cun pôc, Greg Buehl (Michael Shannon), e la gh'à 'n avìś ad sfrat. La dóna la n sà briśa cuma tiràr avànti anc parchè la gh'à na putìna da tiràr sù, la Lily (Chloe Greenfield).
Quànd Jimmy al gh'à da far frònt a na sfida 'd Freestyle cun di àtar rapper négar al n gh la cava minga a vèrar bóca parchè 'l è in imbaràs a èsar 'l ùnic biànc lè in mèś anc parchè 'l è tìmid ad caràtar. Sōl in séguit al s fà valēr tulénd-as n'arvìnsida baténd al pès grôs Papa Doc (Anthony Mackie). In cal mént'r al ragàs, dòp ès'r-as mulâ cun la sò muróśa, la Janeane (Taryn Manning), al dvènta mìg cun l’Alex (Brittany Murphy).