È infedele, mi vendico e lo sposo
|
C'l artìcul chè 'l è scrit in
Miranduléś |
 All Tied Up
| ||
| È infedele, mi vendico e lo sposo | ||
 Zach Galligan in na figùra dal film | ||
| 'L è infedēl, a m véndig e a 'l spóś 1993 | ||
|---|---|---|
| Regìa: John Mark Robinson | ||
| Scritōr: Robert Madero Isabel Mulá • Laura Louden | ||
| Atōr: Zach Galligan • Teri Hatcher • Lara Harris Tracy Griffith • Abel Folk • Edward Blatchford Olivia Brown • Rachel Sweet • Melora Walters | ||
| Müsica: Bernardo Bonezzi | ||
| Léngua: Ingléś | ||
| Dürä dal film: 90 minüt | ||
| Nasiōṅ: Stat Unî • Spaggna | ||
È infedele, mi vendico e lo sposo (’L è infedēl, a m véndig e a 'l spóś), cgnusû in Itàglia anc cuma Pericolosamente insieme (periculośamènt insém) e Preso! (Ciapâ!), l'è na cumèdia americàna e spagnōla dal 1993 ad John Mark Robinson.
Sunt
Brian Hartley (Zach Galligan) 'l è 'n ragàs califurgnàṅ ch'al lavóra cuma giurnalìsta par na rivìsta 'd mùśica insém a la sò capa, la Tara (Olivia Brown). Al śōvan 'l è anc un squàsa-marléti patintâ anc s'adès al gh'à da dar-'g un taj parchè 'l è lè lè par dar 'l anèl ad fidansamènt a la sò muróśa, la Linda Alissio (Teri Hatcher). Na nòt chi lē, turnànd a cà, la 'l bèca a lèt cun n'atra dóna, la Bliss (Melora Walters), cardénd dònca ch'al gh àppia mis i còran mo invéci a n è briśa acsè parchè la furastéra l'è sōl n'imbariàga ch'la s éra insfilsàda lè par punsàr. A dir-la tuta dū cōlp la i arév anc ciapâ vluntéra ma lò a 'l ùltim al s éra tirâ indrē.
La Linda la và a piànśàr da 'l sò amìghi, la Kim Roach (Lara Harris), ch'la gh cunsìlia 'd tajàr-ag via i maròṅ par vindéta, e la Sharon Stevens (Tracy Griffith), na rósa ch'la vrév tacàr na caréra da atōra e ch'la gh'à sèmpar di prubléma a cavàr-as via i pēi da i śnòć druànd al raśōr. Da 'l cant suo Brian al và a sfugàr-'s a 'l bar c'n al sò amìg Max (Abel Folk), pò al próa a far-as pardunàr da la sò muróśa purtànd-ag dal róśi parchè al gh tîṅ dimóndi a lē. Ma faghénd acsè al finìs in na trapla dla Kim ch'la gh la cava a ligàr-'l a 'l lèt maṅ e pē. Al tri amìghi i decìdan pò 'd tgnir-al lè, ligâ cuma 'n salàm, giùst par dar-ag na lesiòṅ.