Volver
|
C'l artìcul chè 'l è scrit in
Miranduléś |
 Volver
| ||
| Volver | ||
 Antonio de la Torre e la Cruz in na figùra dal film | ||
| Turnàr 2006 | ||
|---|---|---|
| Regìa: Pedro Almodóvar | ||
| Scritōr: Pedro Almodóvar | ||
| Atōr: Penélope Cruz • Antonio de la Torre Carmen Maura • Lola Dueñas • Blanca Portillo Yohana Cobo • Chus Lampreave • Carlos Blanco María Isabel Díaz • Yolanda Ramos • Neus Sanz | ||
| Müsica: Alberto Iglesias • Estrella Morente | ||
| Léngua: Spagnōl | ||
| Dürä dal film: 120 minüt | ||
| Nasiōṅ: Spaggna | ||
Volver (Turnàr), prununsiâ [bolˈβer] in spagnōl, 'l è 'n film dramàtic dal 2006 ad Pedro Almodóvar ch'al 'l à anc scrit. Gl'atōri prutagunìsti dal pelìcula i èṅ stadi tuti premiàdi a 'l 59śum Fèstival ad Cannes acsè cuma la senegiadùra. La Penélope Cruz l'è stada pò numinàda, sénsa vìnsar, a i Prèmi Òscar dal 2007.
In na séna dal film, ch'l à muciâ sù da piò 'd utànta-sinc migliòṅ ad dòlar a frònt 'd un cóst ad nóṿ e quàtar, la Carmen Maura la guàrda in televiśiòṅ al film Bellissima ad Luchino Visconti.
Sunt
La paruchéra Soledad (Lola Dueñas), dita Sole, e la Raimunda (Penélope Cruz) i èṅ dū surèli ch'i i vìv'n a Madrid. La prima da par lē dòp ch'la s è divìśa da sò marè, la secónda insém a 'l sò spóś Paco (Antonio de la Torre) e a sò fiōla Paula (Yohana Cobo) ad quatórd'ś an. Chi lē la gh'à 'l nóm cumpàgn a qvél ad na sîna 'd sò màdar (Chus Lampreave) ch'la viṿ incóra da par lē in un paiśèṅ in dla regiòṅ dla Castìglia-La Màcia anc s'la taca a pèrdar di cōlp. Al dū surèli i la vàn'n a catàr pasànd anc p'r al simitèri p'r andàr a purtàr di fiōr a i sò genitōr mòrt in 'n inséndi quàt'r an prima. La Raimunda l'è in pinsēr par la sîna e la vrév ch'l'andìs a star in un ricòvar, par furtùna che lè davśèṅ a gh'è almànc na sò amìga, l’Agustina (Blanca Portillo), ch'la gh tîṅ adrē par qvél ch'la pōl.
Turnàda a cà la Raimunda la vîṅ a savēr da Paco ch'l à péna pardû 'l sò pòst ad lavōr ma a n è gnanc qvàl lè 'l prubléma più graṿ parchè na nòt la cata 'l sò cadàv'r in cuśìna, scurtlâ a mòrt par sò fiōla ch'la s éra arvultàda cóntar parchè al la vliva gusàr dòp avér-ag dit ch'al n éra minga sò pàdar dabòṅ. Méntar la dóna la próa a lugàr al sò còrp in un freezer dal risturànt 'd al sò amìg Emilio (Carlos Blanco) ch'al gh'iva lasâ 'l ciàṿ parchè 'l éra drē a partìr p'r un viàś, la ricév na telefunàda da la Soledad ch'la gh diś che la sîna Paula l'è mòrta. La Raimunda la cata na scuśa p'r a n andàr briśa a 'l funeràł ma pò in dal risturànt a riva òṅ (Leandro Rivera) ch'al dmanda s'la gh pōl far-ag da magnàr parchè i èṅ drē a giràr un film lè davśèṅ e i èṅ in trénta a bèc sut. P'r al fat che la Raimunda l'è in buléta sparàda, la gh diś ad sè.
Quànd la Soledad la tórna a Madrid la cata in dal baùl dla màchina l’Irene (Carmen Maura), sò màdar. È-la 'n spìrit o è-la lē dabòṅ?