Vania King
|
C'l artìcul chè 'l è scrit in
Miranduléś |
_(9617786046).jpg)
La Vania King (Monterey Park, 3 ad Favràr dal 1989) l'è na tenìsta americàna, uriginària ad Taiwan, prufesiunìsta da 'l Luj dal 2006. L'è élta 165 cm e la péśa 59 chilo. La dróa al bras dèstar e la tira drit e arvèrs cun tut e dū al maṅ.
La stà a Boynton Beach (Flòrida). A gh piàś lèśar, cantàr e śugàr a i śōg vìddeo.
In dla sò caréra l'è rivàda a èsar la nùmar sinquànta dal mónd al 6 ad Nuvémbar dal 2006. In dal 2010 l'à vins, insém a la Jaroslava Švedova, i tìtui dal Gran Slam ad dópi a Wimbledon e a gl'US Open. L'à śugâ anc dū finàli ad turnèo WTA vinsénd a Bangkok in dal 2006 cun la Tamarine Tanasugarn par 2-6 6-4 6-4 e pardénd in dal 2013 cun la Shuai Zhang a Cantòn par 6-7 1-6.
Caréra
La califurgnàna la s qualìfica a séd'ś an p'r i US Open e pò la gh la cava anc a pasàr al prim tùran cóntar la Klára Zakopalová prima ad cédar a la francéśa Nathalie Dechy.
In dal 2006 la pèrd cun la Mara Santangelo a 'l prim tùr'n a Pattaya City e in semifinàl a Bangalore. A Indian Wells la riva a 'l tèrs tùran pardénd 2-6 4-6 da la Na Li mént'r a Wimbledon la và fóra in tri sét a 'l secónd tùran cun la Jelena Janković. In Utóbar la s mét in bisàca al tìtul WTA ad Bangkok baténd in finàl la śugadōra ad cà, la Tamarine Tanasugarn, par 2-6 6-4 6-4, ma anc la Lucie Šafářová lung la via. In d'l ùltim turnèo d'l an a Quebec City la bat la Varvara Lepchenko ma pò la céd in di utàṿ cun la Jelena Janković par 6-4 1-6 4-6.
_2011_US_Open.jpg)
In dal 2008 la riva in di quàrt a Cincinnati (2-6 4-6 da l'Amélie Mauresmo), p'r al rèst la mùcia sù sōl di prim e dki secónd tùran. In dal 2009 la s qualìfica minga a gl'Australian Open (in dua la pèrd da la parmśàna Alberta Brianti) ma la 'l fà a Monterrey in dua la riva anc in di quàrt in dua la céd par pôc a la Marion Bartoli par 6-2 2-6 3-6. In Istâ la pèrd a 'l secónd tùran a Wimbledon (2-6 2-6 da la Flavia Pennetta) e a Los Angeles (4-6 6-4 1-6 da l'Ana Ivanović). A gl'US Open la riva a 'l tèrs tùran baténd la Nastas'sja Jakimava e la Samantha Stosur par pò lasàr strada a la Daniela Hantuchová. A Quebec City invéci la i tōś a 'l secónd tùran da la Bethanie Mattek-Sands par 3-6 3-6 e la sèra 'l an a 'l 79śum pòst.
In dal 2010 la bat la Dominika Cibulková a gl'Australian Open ma pò la céd a la Roberta Vinci par 6-7 5-7. In Mars la riva in di quàrt a Monterrey (6-2 2-6 1-6 da la Daniela Hantuchová) e a 'l secónd tùran a Indian Wells (7-5 2-6 4-6 da la Caroline Wozniacki). In Maǵ a Straśbûrg la bat l'Elena Vesnina, l'Alizé Cornet e l'Anastasija Rodionova pardénd pò in semifinàl da la Kristina Barrois par 6-2 2-6 6-7. A la fiṅ dla stagiòṅ la mét in fila soquànt secónd tùran a Montreal, US Open e Seùl.
In dal 2011 la ciàpa na scòpla, 1-6 0-6, da la numàr òṅ dal mónd Caroline Wozniacki a 'l secónd tùran di Australian Open. A Madrid l'è bòna ad bàtar subìt la Nadia Petrova par 6-1 7-6 ma pò la Bethanie Mattek-Sands la la sćiànca par 6-0 6-2. A 'l Roland Garros la pèrd a 'l tèrs tùran da la Petra Kvitová mént'r a Carlsbad la patìs un 3-6 2-6 da la Sara Errani a 'l secónd tùran. In Setémbar la riva a 'l tèrs tùran a gl'US Open (2-6 4-6 da la Caroline Wozniacki), a Seùl (2-6 6-4 1-6 da la Klára Zakopalová) e a Tokyo (1-6 6-7 da la Petra Kvitová). L'americàna la finìs 'l an a la puśisiòṅ stanta-siē dal ranking.
A 'l inìsi dal 2012 la cata par dū vòlti la Daniela Hantuchová a Brisbane e a Pattaya City e la sò bistiàsa négra la gh fà patìr la sètma scòpla su sèt incóntar baténd-la in di utàṿ e in di quàrt dòp che l'americàna l'éra stada bòna ad rivàr a 'l tèrs tùran anc a Melbourne (3-6 4-6 da la Ana Ivanović). A Indian Wells la bat subìt la Sara Errani 7-6 6-4 e l'Anastasija Pavljučenkova 6-4 6-4 ma pò la n è minga bòna ad śugàr 'l incóntar dòp cun l'Angelique Kerber. La King la cata incóra la tedésca a 'l secónd tùr'n a Róma e la gh pèrd par 3-6 2-6 dòp avér stéś la Cvetana Pironkova par 6-0 6-1. In Istâ la riva in semifinàl a Washington ma pò la pèrd in tri sét da l'Anastasija Pavljučenkova. In séguit la mét in fila sinc prim tùr'n ad fila pardénd cun l'Eleni Daniilidou a Cincinnati, cun la Jaroslava Švedova a gl'US Open, cun la Kiki Bertens a Seùl, cun la Jie Zheng a Tokyo e cun la Julia Görges a Pechîn.
Al sò mumènt négar al cuntìnua anc in dal 2013 in dua o la và fóra subìt o la n pasa gnanc al qualificasiòṅ. La tórna a vìnsar na partìda a Charleston in Avrìl cun la Jaroslava Švedova ma pò la céd subìt dòp a l'Andrea Petković. A 'l Roland Garros la pasa 'l qualificasiòṅ e pò la riva a 'l secónd tùran in dua la pèrd par 1-6 3-6 da la Sloane Stephens. In Agóst la céd a la Viktoryja Azaranka par 1-6 6-7 a 'l secónd tùran ad Cincinnati. La fà méj a Cantòn in dua la riva in finàl dòp sèt an ma pò la gh'à da pigàr-as a la śugadōra ad cà, la carta salvàdga Shuai Zhang, par 6-7 1-6. A Uśàka, da qualificàda, la manda a cà la Flavia Pennetta par 3-6 7-5 6-0 ma a 'l secónd tùran a và avànti la Barbora Záhlavová-Strýcová in tri sét.
L'americàna la riva in di semifinàl a Shenzhen in dal 2014 baténd la Petra Martić 7-5 4-6 6-3, la Sara Errani 2-6 7-6 6-3 e la Barbora Záhlavová-Strýcová 6-2 6-4. In sal più bèl però la n pōl minga śugàr cóntar la Shuai Peng parchè infurtunàda a la gamba dèstra.