The Bangles

C'l artìcul chè 'l è scrit in Miranduléś

«

Out my window the rain starts to fall and the wind blows through an empty hall, in the mirror ooh, reflections of you, in the distance I hear a sound, is that you coming around. Oh what you gonna do, I think I should be with you.»

(EN)(Be With You, 1989)

«

Fóra da la fnèstra a taca a piōvar e a sóppia 'l vènt lung na sala vōda, in dal spèć ooh, di riflès ad tè, da luntàṅ a sènt un sòṅ, at sē tè ch'at rîṿ da na quàlc banda. Oh cuśa farà't? A pèns ch'a gh'arév da star tèg.»

(MUD)

Al Bangles (Brasalét in emigliàṅ, a s lèś /ˈbæŋ.ɡəls/ in ingléś o anc /ˈbeɪŋ.ɡəls/ dita a l'americàna), i èṅ un grup pop-rock califurgnàṅ nâ in dal 1981.

I sò cumpunènt i èṅ tuti dóni: al chitarìsti Susanna Hoffs e Vicki Peterson, sò surèla baterìsta Debbi Peterson e la basìsta, ex dal Runaways, Michael Steele. Chi lē la s éra śuntàda sōl in dal 1983 par pò bandunàr al grup in dal 2005. Prima 'd lē a gh'è stada l'Annette Zilinskas che però l'à sunâ sōl in dal prim EP umònim dal 1982.

Al Bangles i aṅ fat vgnir fóra sinc àlbum, catànd al sucès in di an Utànta cun soquànt sìngui cuma Walk Like an Egyptian (nùmar òṅ in dla Billboard americàna dal 1987), Manic Monday, In Your Room e Eternal Flame, sucès mundiàł dal 1989. In dal 1988 i aṅ fat na cover ad Paul Simon dal braṅ Hazy Shade of Winter par la culòna sunóra dal film Al di là di tutti i limiti.