Tea Party
|
C'l artìcul chè 'l è scrit in
Miranduléś |
Al Tea Party (literalmènt “Partî dal tè”) 'l è 'n muimènt pulìtig cunservadōr e pupulìstic ad dèstra di Stat Unî, ligâ a 'l Partî Republicàṅ, ch'l è saltâ fóra in dal 2009. In dal nóm i vōl'n arcurdàr al Boston Tea Party, 'n at arvultóś dal 16 ad Dicémbar dal 1773 di culòni americàṅ cónt'r al Régn Unî ch'l i masàva 'd tasi.
Chi lōr i èṅ p'r al marcâ lìbar, cónt'r al salvatàǵ pùblic dal banchi fat par George W. Bush e par Barack Obama durànt la criśi dal 2008, al finansiamènt pùblic dla salùt, e p'r arbasàr, e 'd dimóndi, al tasi. Inóltar i èṅ dimóndi cunservadōr in fat ad tradisiòṅ, famìja e religiòṅ.
Anc s'al muimènt, pumpâ dimóndi da 'l canàł televiśìṿ Fox News, al n gh'à minga di cap parchè 'l è 'n muimènt lìbar[1], fra i sò espunènt a 'rcurdém la guvernadōra d'l Alàska, la Sarah Palin, al senadōr dal Tèxas Ted Cruz, al senadōr dla Flòrida Marco Rubio e 'l pulìtig Ron Paul.
Nòti
- ↑ Un Tea party in dla pansa dl'Amèrica... e 'd tut chi àt'r in dal mónd Il Sole 24 Ore, 28 ad Setémbar dal 2010