Teàtar dal Pòpul (Cuncòrdia)
|
C'l artìcul chè 'l è scrit in
Miranduléś |
Al teàtar dal Pòpul 'l è 'n teàtar stòric dla Cuncòrdia in pruìnsa 'd Mòdna. Al s cata in via dla Paś 108 e 'l gh'à sincsènt pòst a sēdar.
'L è stâ inaugurâ in dal 1934 c'n al nóm ad Teàtar dal Litòri ma pò al 'l à cambiâ cun qvél 'd adès dòp la secónda guèra mundiàla. 'L è 'd pruprietà dal cumùṅ ma 'l è sèmpar stâ gestî da di privâ.
Stòria
Al teàtar 'l è stâ tirâ sù in èpuca fasìsta, c'n un stîł neo-clàsic. Al gh'à 'n àndit in du i s fàn'n i bijét, pò a gh'è anc un bar. La sala l'è a piànta retangulàra cun dal galerìi a fèr ad cavàl.
In dal 2012 al teàtar 'l à patî di dan da 'l taramòt dl'Emìglia e 'l è stâ sarâ. In dal 2019 'l è stâ fat un prugèt par giustàr-al cun 'n investimènt prevìst ad tri migliòṅ e pasa 'd euro[1].
Nòti
- ↑ Teàtar dal Pòpul, preśentasiòṅ dal prugèt definitìṿ/eśecutìṿ Comune di Concordia sulla Secchia, 5 'd Avrìl dal 2019