Teàtar cumunàł Webben Facchini
|
C'l artìcul chè 'l è scrit in
Miranduléś |
.jpg)
Al teàtar cumunàł Webben Facchini 'l è 'n teàt'r ad Mdóla in pruìnsa 'd Mòdna. Al s cata in dal sò piàsa prinsipàla, la Piàsa dal Pòpul, e 'l gh'à 248 pòst a sēdar.
'L è stâ inaugurâ al 27 'd Utóbar dal 1928 cun l'òpra Lusìa 'd Lammermoor ad Gaetano Donizetti.
Stòria
Al teàt'r ad Mdóla, in alóra ciamâ Teàtar dal Litòri, 'l è stâ fat in dal 1927 in èpuca fasìsta, darènt a 'l munisìpi. 'L edifìsi al pō cuntàr su 'n còrp sōl a piànta retangulàra. La fasàda l'arciàma 'l stîł mudernìsta dal tèmp.
'L è stâ prugetâ par 'l architét miranduléś Araldo Vincenzi e par 'l inśgnēr Renzo Bertolani. Al gh'à 'n àndit, na sala a l'itagliàna a fèr ad cavàl cun na galerìa sōla su tri bandi e 'n palc c'n al sò sót-palc.
In dal secónd dòp-guèra, fra 'l 1946 e 'l 1948, 'l è stâ intitulâ a 'l śōvan partiśàṅ mduléś Webben Facchini, masâ in dal 1945 da i naśi-fasìsta. In séguit, a la fiṅ di an Sinquànta, 'l è stâ ristruturâ e a gh'è stada fata na sala p'r al cìnema.
In dal 2012 al teàtar 'l à patî di dan da 'l taramòt dl'Emìglia e 'l è stâ sarâ par di an, in fiṅ tant ch'l è stâ giustâ cun na spéśa 'd setsènt-mila euro e avèrt incóra al 9 ad Dicémbar dal 2018.