Trine Michelsen
|
C'l artìcul chè 'l è scrit in
Miranduléś |
La Katrine Michelsen, cgnusùda méj cuma Trine Michelsen (Gentofte, 21 ad Śnar dal 1966 – Cupenàghen, 17 ad Śnar dal 2009), l'è stada n'atōra e mudèla danéśa.
Biugrafìa
La Katrine la pèrd i sò genitōr, al giurnalìsta e crìtic ad cìnema Ole e sò mujér Nina, in 'n incidènt in màchina quànd la gh'iva sōl tri an. In dal 1984 la vins al tìtul ad Miss Danimàrca e par lē i s vèr'n al pòrti dal cìnema in Itàglia.
In dal 1986 la rècita in La bonne ad Salvatore Samperi pò la fà la part dla mudèla masàda c'n un furcàr, la Kim, in Le foto di Gioia ad Lamberto Bava. Sèmp'r in c'l an lè la gira 'l film ad scarésa Spettri insém a Donald Pleasence.
In dal 1988 l'è la prutagunìsta dal film dramàtic Tentazione ad Sergio Bergonzelli méntar par Gordon Hessler la gira 'l thriller La ragazza sull'altalena, 'l ùnic sò film americàṅ, faghénd na part pìcula. In dal 1998 la lavóra finalmènt p'r un film danéś, Idioti ad Lars von Trier.
In di an Dumìla la gh dà 'n taj cun la sò caréra 'd atōra anc parchè in d'l Avrìl dal 2005 la fà savēr ch'l'è drē a far la chémio parchè la gh'à 'n càncar a na paléta ma a n gh'è gnint da far parchè in Dicémb'r al sò mâł al s è bèla stramnâ dapartùt, anc in di òs. La Trine la mōr ch'la n gh'iva gnanc quarànta-tri an a 'l inìsi dal 2009.
Filmugrafìa
- 1984 - En verden der blegner, regìa ad Franz Ernst - Film TV
- 1986 - La bonne, regìa ad Salvatore Samperi
- 1987 - Le foto di Gioia, regìa ad Lamberto Bava
- 1987 - Spettri, regìa ad Marcello Avallone
- 1988 - Tentazione, regìa ad Sergio Bergonzelli
- 1988 - La ragazza sull'altalena (The Girl in a Swing), regìa ad Gordon Hessler
- 1994 - Eva, regìa ad Vibeke Gad - Film TV
- 1998 - Idioti (Idioterne), regìa ad Lars von Trier
- 1999 - Antenneforeningen, regìa ad Søren Fauli