Saturno contro
|
C'l artìcul chè 'l è scrit in
Miranduléś |
 Saturno contro
| ||
 La Serra Yilmaz e Timi in na figùra dal film | ||
| Satùran cóntar 2007 | ||
|---|---|---|
| Regìa: Ferzan Özpetek | ||
| Scritōr: Ferzan Özpetek • Gianni Romoli | ||
| Atōr: Stefano Accorsi • Margherita Buy Pierfrancesco Favino • Ennio Fantastichini Serra Yilmaz • Filippo Timi • Ambra Angiolini Luca Argentero • Michelangelo Tommaso Milena Vukotic • Isabella Ferrari • Luigi Diberti | ||
| Müsica: Neffa | ||
| Léngua: Itagliàṅ • Spagnōl | ||
| Dürä dal film: 110 minüt | ||
| Nasiōṅ: Itàglia • Turchìa • Frància | ||
Saturno contro (Satùran cóntar) 'l è 'n film dramàtic dal 2007 ad Ferzan Özpetek, dedicâ a 'l scritōr turc Hrant Dink.
La pelìcula l'à fat sù dagnóra òt migliòṅ 'd euro, a frònt 'd un cóst stimâ ad sinc migliòṅ e mèś, e l'à vins un Dàvid ad Dunatèl cun l'Ambra Angiolini, chè a 'l sò debùt da atōra, e quàtar Nàstar 'd Argìnt.
Sunt
Antonio Pontesilli (Stefano Accorsi) al fà 'l banchēr. 'L è spuśâ cun la psicòluga Angelica (Margherita Buy), ch'la s dà da far par far śmét'r ad fumàr la gint, e 'l gh'à dū fiōi pìcui. Al sò matrimòni al và in criśi quànd al cgnós la Laura (Isabella Ferrari), spuśàda anc lē, ch'la gh'à 'n negòsi 'd fiōr e ch'la dvènta la sò amànta.
I Pontesilli i èṅ amìg dla Neval (Serra Yılmaz), na furastéra ch'a Róma la fà 'l tradusiòṅ da 'l Turc, e 'd sò marè Roberto (Filippo Timi), un pulisiòt schis ch'al tartàja da spés. Dal gir di amìg i fànan part anc la còpia gay furmàda p'r al scritōr Davide (Pierfrancesco Favino) e par 'l agìnt publisitàri Lorenzo (Luca Argentero), d'l èx muróś ad Davide, al bòṅdagnìnt Sergio (Ennio Fantastichini) ch'al viṿ druànd i bèsi ch'i gh'aṅ lasâ i suo, dla culéga 'd Lorenzo, la Roberta (Ambra Angiolini), na dóna cun la pasiòṅ par l'astrulugìa e par la dròga, e dal śuvnòt bisèx Paolo (Michelangelo Tommaso), diplumâ in madśìna.
Un dè, durànt na séna fra 'd lōr, Lorenzo al s sènt mâł par via dn'emuragìa a 'l sarvèl. Al śōvan al vîṅ purtâ a 'l uśdàł in présia ma 'l sò destîṅ 'l è praticamènt sgnâ a dita dla cap-infarméra Marta (Milena Vukotic). I sò amìg, la sò “famìja ślargàda”, i pàsan da spés a catàr-al, acsè cuma i sò genitōr rivâ da 'l Piemònt, Vittorio (Luigi Diberti) e la Minerva dita Minnie (Lunetta Savino), èx paruchéra.