Renato Crotti
|
C'l artìcol chè 'l è scrit in
Carpśàn |
Al Renê Cróti (Chèrp, 4 ed mers dal 1921 - Mòdna, 10 ed fervèr dal 2015) 'l è stê 'n imprenditōr e 'n scritōr carpśàn.
Biugrafìa
Fiōl dal Licinio e sgnōra, ch'i gh'ìv'n al negósi "La casa della lana" in dal sàint'r a Chèrp, al Renê al crès in dl ambiìnt giust p'r imparèr fin da ragàs quèl ch'i ìn i sacrifìsi e quèl ch'a servìs per fèr crèser n'aśiènda. Al gh'la cavèva, anch'in tèimp ed Guèra, 'd iscrìv'r-es a la facoltê 'd Economìa e Cumérsi a Bulògna, e vgnû fóra dala Guèra, 'd tōr un gròs prêst ed bési dala banca per mèter sù la só dìta 'd cumérsi e pò 'd produsiòun ed filê 'd lani, che in cal mumèint lè anc dàint'r a la sitê 'd Chèrp a tachèva a gnìr-egh na bòuna dmanda.
Cun na graṅ pasiòun, in soquànt an, al Renê al fèva cgnùser la só dìta SILAN a 'n livêl internasionêl, ch'l'éra dvintèda 'n riferimèint per tùti chegli ètri aśièndi dal tèsil, ch'i fùsen itagliàni o furastéri. Al gh'ìva anc da invièr soquànti ètri fàbrichi fóra ded Chèrp, in dl'Itàglia, ch'l ìva mucê anca 1.360 dipendèint[1]. 'D lung a 'l tèimp al gh'ìva pò anc da patìr dimòndi sù e śò p'r el batàj sindachèli, la concoràinsa in créser di Paēś edl Est, e 'l gh'ìva dòunca da cambièr dimòndi progrâṁ, jutê in queschè dai dū fiō màsć, al Dàvid e 'l Daniēl, in dal tirèr sù insèm a lò, la holding ed famìja[2]
Chegli ètri só ativitê
Daint'r i prìm an Essanta, a 'l Cróti a gh'vin in amèint ed fèr vèder, ai uvrêr piò 'd sinìstra e anc ai sindacalìsta, che i Paēś dal sucialìśem reêl i nn'ìn pò mia acsè da invidièr, e dòunc'al taca a organiśèr di pullman 'd viâś gratis in dla Rusia e in di Paēś edl Est che nisùn al s i pōl eśminghèr[3]. Turnê a cà da chi viàś lè, piò 'd 200 agìnt i còunten el brùti cundisiòun e soquànt diśàster ch'i ìven vist laśò.
I só scrìt
- Renato Crotti, Una crepa nel Muro, Ariete Comunicazione Editore, 2008. Al cumprènd In attesa di un pullman e soquànti pêrt ed Il teorema della padrona di casa e della colf.
- Renato Crotti, @gorà on line. Liberali e libertari: una querelle telematica, Teorema, 2004. Dispunìbil online dū versiòun ch'i gnìven prìma 'd quèla publichèda.
- Renato Crotti, Riflessioni per riflettere, Teorema, 1999 (sgònda edisiòun: 2001). Dispunìbil online. Al cumprènd In attesa di un pullman e soquànti pêrt ed Il teorema della padrona di casa e della colf.
- Renato Crotti, Il teorema della padrona di casa e della colf e In attesa di un pullman, Temi, 1996 (sgònda edisiòun: 1997).
- Renato Crotti, In attesa di un pullman, Calderini, 1991.
Colegamèint estèren
- (IT) 'N artìcol comemoratìv in dal Rest dal Carlèin
- (IT) Al colegamèint a 'n só scrìt in dla reda
- (IT) Al colegamèint ala só paśna Facebook in dla réda.
Referèinsi
- ↑ (IT) Dizionario biografico dei carpigiani del Novecento, dal Mario Pecoraro, 'l Gianfranco Guaitoli, e 'l Sandro Bellei, Mòdna, 1999.
- ↑ (IT) 'N artìcol a 'l riguèrd dla demolisiòun dal već stabilimèint ed Quartirōl 'd Chèrp, màinter che 'l diferèinti produsiòun i fan cô ala DMR
- ↑ (IT) 'L artìcol dal 27 'd utòber 1963 in sìm'a 'l New York Times a 'l riguêrd di viâś in dl URSS dal Cróti