Psychosis
|
C'l artìcul chè 'l è scrit in
Miranduléś |
 Psychosis
| ||
| Psychosis | ||
 Harnett e la Carpenter in na figùra dal film | ||
| Psicóśi 2010 | ||
|---|---|---|
| Regìa: Reg Traviss | ||
| Scritōr: Reg Traviss • Michael Armstrong Richard Raynesford • Katrena Rochell | ||
| Atōr: Charisma Carpenter • Richard Raynesford Paul Sculfor • Darren Bransford • Ricci Harnett Justin Hawkins • Ty Glaser • Sean Chapman Bernard Kay • Josh Myers • Katrena Rochell | ||
| Müsica: Scott Shields | ||
| Léngua: Ingléś | ||
| Dürä dal film: 89 minüt | ||
| Nasiōṅ: Régn Unî | ||
Psychosis (Psicóśi) 'l è 'n film ad scarésa britànic dal 2010 ad Reg Traviss.
Sunt
In dal 1992 un grup ad śōvan eculugìsta e anàrchic al piànta 'l téndi in dla campàgna ingléśa in du i gh'aṅ da far pasàr n'autostràda ma 'n manìac (Tom Gaughan) cun na manàra al i fà fóra tut, a part una, prima 'd murìr a sò vòlta p'r un cōlp ad sćiòp 'd un casadōr (Neil McCaul).
Quìnd'ś an dòp la scritōra califurgnàna Susan (Charisma Carpenter) la s trasferìs in Inghiltèra insém a sò marè David (Paul Sculfor) parchè la gh'à d'armét'r-as da 'n eśaurimènt narvóś e par far-al la tōś in afìt na vila iśulàda in di dintór'n ad Lóndra. Chè la cgnós al prevòstar Swan (Bernard Kay), pò la dascór cun 'l editōr Charles (Richard Raynesford) 'd al lìbar śal ch'la gh'à da scrìvar.
La Susan la taca però a sintìr di stus e a védar di quèi strâṅ cuma 'n ragàs ch'al śōga a balòṅ in giardèṅ o l'àqua dla vasca da bagn rósa pinsànd ch'la sia sangṿ méntar sò marè al gh diś ch'l'è acsè par via dla ruśna. Durànt un gir in dal bòsc la cata 'n óm ad nóm Peck (Ricci Harnett) ch'l è drē a gusàr-as una e ch'al gh cata gust a far-al davànti a lē. La Susan la próa a scapàr via ma chi lò al fà in tèmp a bcar-la listés e a far-as védar nûd vréd 'l impermeàbil ch'al gh'iva adòs. Quànd la tórna a cà la vîṅ a savēr che cal purcùs lè 'l è 'l guàrdia-casa sarnî da David par lauràr sèg.
Na nòt la Susan la s déśda sinténd di ciòc dònca la manda sò marè a védar s'a gh'è qualchidòṅ in cà ma lò al n véd ninsòṅ a difarénsa dla dóna ch'la fà a mènt par 'n àtim a 'n tisi ch'al cur via lung a 'l andavèṅ. Al detective Sergeant (Sean Chapman) però al n gh pōl minga 'd èsar-'g 'd ajùt alóra lē la fà cambiàr tut al ciavadùri dla cà ma fórsi a sarév méj ch'la cambìs la sò mènt parchè la gh'à na psicóśi in dla suca.