Picacìśum

C'l artìcul chè 'l è scrit in Miranduléś

Al Picacìśum, cgnusû anc cuma Allotriofagìa o anc sōl cuma Pica, 'l è 'n distùrub dal cumpurtamènt alimentàr ch'al custrìnś la gint a ciuciàr o a mandàr śò di quèi ch'i n èṅ minga dal ròbi da magnàr dabòṅ cuma dla sàbia, dla carta, dla varnìś, di cavìi, dla tèra, di metài, dal detersìṿ, dal cutòṅ, di giaròṅ, dal giàs, dal śés, dal légn, dla mèrda e via dascurénd.

Al nóm ad cal mâł chè al daśvîṅ da 'l cumpurtamènt dla gaśa, Pica pica in latìn, ch'la gh'à 'l visi ad tastàr tut qvél ch'la cata in gir. 'L è ciàr che magnàr di prudót muśnènt e tòsic a pōl purtàr di prubléma anc graṿ par la salùt.

Descrisiòṅ

Al distùrub al pōl èsar diagnusticâ sōl s'al cuntìnua par più 'd un méś e sōl quànd a n s è piò di putèṅ pìcui in fiṅ a dū an e a n s è briśa di ciucâ in dal sarvèl.

Inóltar a gh'è da tiràr via anc i caś in dua l'è la cultùra dal pòst ch'a fà magnàr di quèi dal gènar. A risć ad bcar-as cal distùrub chè a gh'è 'l dóni insìnta parchè a s è vdû che dal vòlti a gh vîṅ vója 'd far di pcâ 'd góla, a s fà par dir, mandànd śò dla carna cruda o dal giàs.

Dagnóra tut al vòlti a dar al via a cal visi chè l'è n'anemìa par mancànsa 'd fèr dònca s'a s mét'n a pòst al ròbi pò la pica la pasa da par lē. A secónda ad qvél ch'a s magna, al distùrub al pōl ciapàr di nóm più specìfic cuma coprofagìa (mèrda), urofagìa (pisa), emetofagìa (gòmit), geofagìa (tèra), emofagìa (sàngṿ), tricofagìa (pēi o lana), onicofagìa (ungi) e àt'r incóra. Anc a i gat a gh pōl vgnir al picacìśum, par far 'n eśèmpi quànd i ciùcian na maja 'd lana cuma s'i titìsan.

Culegamènt estéran

(IT) La schéda dal Picacìśum in dal sit Medicina 360