Michail Južnyj
|
C'l artìcul chè 'l è scrit in
Miranduléś |
Michail Michajlovič Južnyj (Михаил Михайлович Южный in rus, Mikhail Youzhny in ingléś, IPA: [mixaˈil ˈjuʒnɨj], scólta'l chè) 'l è 'n tenìsta rus, nâ a Mósca al 25 ad Śugn dal 1982.
Al śóga 'l arvèrs cun na maṅ sōla e 'l è dimóndi śvèlt a móv'r-as. 'L è élt 1,84 mètar e al péśa 73 chilo.
Al pòst più élt in dla clasìfica d'l ATP al 'l à catâ in dal Śnar dal 2008 e in d'l Utóbar dal 2010 quànd 'l è rivâ a èsar al nùmar òt dal mónd.
In dla sò caréra 'l à vins òt turnèo ad singulàr e anc la Cópa Davis par dū vòlti, in dal 2002 (quànd baténd al francéś Paul Henri Mathieu 'l à purtâ al punt deciśìṿ) e in dal 2006. Par dū vòlti 'l è stâ bòṅ ad rivàr in semifinàl in di US Open (2006 e 2010) e anc in di quàrt a gl'Australian Open (2008), a 'l Roland Garros (2010) e Wimbledon (2012).
In dópi 'l à invéci purtâ a cà nóṿ tìtui in tut.
Južnyj 'l è anc cgnusû p'r èsar òṅ narvōś mat quànd al fà di śbali tulénd-as-la sèg cuma quànd in d'l Avrìl dal 2008 a Key Biscayne in Flòrida al s è śbragâ la tèsta dand-as di cólp adòs cun la rachéta dòp avér mancâ 'n punt in dla partìda còntra Nicolás Almagro, pò vinsa listés.
Fra i sò riśultâ più impurtànt a gh'è na finàla vinsa par 6-0 6-1 còntra Rafael Nadal in dal Śnar dal 2008 in sal cimènt a Chennai e una a Mósca in d'l Utóbar dal 2009 còntra Janko Tipsarević par 6-7 6-0 6-4.
Par cóntar 'l à pardû déś finàli cuma qvéli ad Dubai dal 2007 còntra Roger Federer par 4-6 3-6, ad Valénsia dal 2009 còntra Andy Murray par 3-6 2-6 e qvéla ad Dubai dal 2010 còntra Novak Đoković par 5-7 7-5 3-6.
Vita privàda
Mikhail 'l è spuśâ cun la Yulia e sèg al gh'à un putèṅ, Maxim, nâ in dal Dicémbar dal 2009.
In dal Dicémbar dal 2011 al s è laureâ in filuśufìa.