C'l artìcul chè 'l è scrit in Miranduléś Emiliàn

Matador
Matador

Banderas e la Carmen Maura in na figùra dal film
Masadōr
1986
Regìa: Pedro Almodóvar
Scritōr: Pedro Almodóvar • Jesús Ferrero
Atōr: Antonio BanderasCristina Sánchez Pascual
Nacho MartínezCarmen MauraJulieta Serrano
Eusebio PoncelaEva CoboAssumpta Serna
Chus LampreaveLuis CigesVerónica Forqué
Müsica: Bernardo Bonezzi
Léngua: Spagnōl
Dürä dal film: 114 minüt
Nasiōṅ: Spaggna


«
Al pèś a n è minga èsar viulentàda, 'l è che pò ad gh'à da cuntàr incòsa a tut, da la A a la Z.»
(Batùda dla màdar dl’Eva)


Matador (Masadōr) 'l è 'n film dramàtic dal 1986 ad Pedro Almodóvar.

A 'l inìsi ad cal lavōr chè, al regìsta manciàṅ al mét insém di pès vèć ad film ad scarésa, cuma Sei donne per l'assassino ad Mario Bava e Profonde tenebre ad Jess Franco.

Sunt

Diego Montes (Nacho Martínez) 'l è 'n ex turêr ch'l à patî 'n incidènt ch'al 'l à custrét a lasàr al sò lavōr. La sò usesiòṅ ad masàr però la n al lasa minga in paś. Par tōr la sò sudisfasiòṅ, chi lò al s fà dal pugnéti guardànd di film ad masamènt ad dóni a la televiśiòṅ. Adès al tira avànti insgnànd al sò mistēr a i śóvan, in mèś a i quài a gh'è Ángel (Antonio Banderas), òṅ ch'al gh'à paùra quànd al véd dal sangṿ e ch'l è fiōl 'd una cun al ciòld fis par 'l Opus Dei, e anc dal studènti dóni. Diego al và a lèt cun dū ad lōr e, durànt al piaśér, al i masa e pò al lóga i cadàvar.

Durànt na lesiòṅ, al mìstar al dmanda pò a Diego s'l è fnòć parchè al s la cava mâł cun cal dóni ma lò al gh rispónd ad no e ch'al gh al dimustrarà. Più tard Ángel, par far védar 'd ès'r un masć dabòṅ, al próa a viulentàr na sò vśina ad cà, la murōśa ad Diego e mudèla Eva (Eva Cobo). Méntar chi lē l'è drē a scapàr via, la strabùca in dla śmalta e la s taja la ganàsa, tacànd a sanghnàr. Ángel al n s cumpatìs minga cla vduda lè e al pèrd i sèns. Par cal fat lè, sò màdar la 'l cuntrìnś a 'ndàr a cunfesàr-'s in céśa ma lò invéci al cònta incòsa a la pulisìa. L’Eva la dà la sò versiòṅ di fat, la diś che lò 'l à śburâ prima ad purtàr a cumpimènt al sò at e la questiòṅ la finìs lè. Al cumisàri (Eusebio Poncela) al fà pò véd'r a 'l śóvan al fóto dal dū dóni sparìdi e Ángel al s fà càrag di masamènt, dgénd ch'l è stâ lò. A difénd'r-al a gh'è la psicòluga Julia (Carmen Maura).

L'avucàt 'd Ángel, la María Cardenal (Assumpta Serna), la gh'à un visi cumpàgn a qvél ad Diego, la masa i sò amànt durànt al ciulàdi. Quànd i dū i s cgnósan, a scròca subìt la mòla, in un stravènt 'd amōr e mòrt.

Culegamènt estéran