Martha
|
C'l artìcul chè 'l è scrit in
Miranduléś |
 Martha
| ||
| Martha | ||
 La Carstensen e la Valentin in na figùra dal film | ||
| id. 1974 | ||
|---|---|---|
| Regìa: Rainer Werner Fassbinder | ||
| Scritōr: Cornell Woolrich | ||
| Atōr: Margit Carstensen • Kurt Raab • Lilo Pempeit Karlheinz Böhm • Ingrid Caven • Ortrud Beginnen Barbara Valentin • Peter Chatel • Günter Lamprecht El Hedi Ben Salem • Adrian Hoven • Ingrid Caven | ||
| Müsica: Peer Raben | ||
| Léngua: Tedésc • Itagliàṅ | ||
| Dürä dal film: 93 minüt | ||
| Nasiōṅ: Germàgna Òvest | ||
Martha (id.) 'l è 'n film dramàtic tedésc dal 1974 girâ par la televiśiòṅ ad Rainer Werner Fassbinder.
Sunt
La Martha (Margit Carstensen) l'è na śōvna ch'la lavóra in dla bibliutéca 'd Custànsa in dal Baden-Württemberg. Durànt un viàś in Itàglia la pèrd sò pàdar par 'n infàrt ma almànc al cgnós a Trinidà di Mònt a Róma 'n tedésc ad nóm Helmut Salomon (Karlheinz Böhm) ch'al lavóra par n'indùstria dal cimènt. Turnàda in Germàgna chi lò al dvènta 'l sò muróś.
I dū i sa spóśan ma pò lò al càmbia, al taca a tratàr-la mâł, a dar-'g adòs a livèl psiculògic e anc fìśic, al gh i dà e al la viulénta anc. Gelóś mat, Helmut al gh pruibìs 'd andàr fóra 'd cà e al s arlìa sèg parchè a lē a gh piàś la mùśica ad Gaetano Donizetti invéci ad qvéla 'd Urlànd ad Las, dònca la gh'à da tacàr subìt a cambiàr regìstar. La Martha la gh'à paùra a cuntàr in gir la sò vita 'd terōr cuntìnuv, gnanc a la sò amìga Marianne (Barbara Valentin), parchè la pénsa che ninsòṅ a n gh cardrà mai méntar par sò marè lē l'è sōl òṅ di sò śavàj da śibìr in sucietà.
Sinténd-as sèmpar da par lē la Martha la decìd ad cumpràr-'s un gat par pruàr na cria 'd afèt ma Helmut al gh al fà catàr mòrt. La dóna la taca a 'ndàr fóra 'd tèsta e la decìd ad dmandàr ajùt a 'n amìg dla bibliutéca, al sgnōr Kaiser (Peter Chatel). Chi lò al decìd ad dar-'g un pasàǵ par dascórar sèg ma la Martha, ch'la créd śbaliand-as che sò marè al sia drē a tgnir-'g adrē in màchina, la tōś in maṅ al vulànt par tajàr śò e la fà far 'n incidènt. Purtàda a 'l uśdàł, l'infarméra la gh diś che Kaiser 'l è mòrt e che lē l'è armàśa uféśa a 'l gambi e ch'la gh'arà da druàr na scrana a rudèli par tuta la vita parchè la n è più bòna 'd giràr da par lē ma almànc la gh'à 'n marè ch'al n la mularà mai e ch'l armagn'rà sèmpar sèg.