Margarita Gasparjan
|
C'l artìcul chè 'l è scrit in
Miranduléś |
_(1)_def._Marina_Melnikova_(RUS)_(20980820475).jpg)
La Margarita Gasparjan, (Mósca, 1 ad Setémbar dal 1994, Маргари́та Ме́ликовна Гаспаря́н in Rus) l'è na tenìsta rusa ch'l'è stada la nùmar quarànt'òṅ dal mónd al 15 ad Favràr dal 2016. L'è élta 183 cm par 73 chilo e la dróa 'l bras dèstar tirànd 'l arvèrs cun na maṅ sōla.
In dla sò caréra l'à vins un tìtul WTA in singulàr e dū in dópi ch'la śōga in gènar insém a l'Aleksandra Panova.
Caréra
Fiōla 'd 'n industriàł e dna paruchéra, la Margarita la śōga i sò prim incónt'r in dal 2010 tacànd da 'l sircùit ITF. 'L an dòp la tōś part a 'l qualificasiòṅ dla Kremlin Cup cun na carta salvàdga in bisàca ma la và fóra subìt cun l'Arantxa Parra Santonja par 7-6 5-7 6-7. In dal 2012 la vins tri turnèo ITF da vintsìnc-mila dòlar ad fila śugâ a Mósca pò la fà àtar tant in Setémbar, sèmp'r in Rùsia. In Utóbar la fà sudàr dimóndi la Lucie Šafářová a la Kremlin Cup pardénd sèg 3-6 6-4 2-6.
.jpg)
In dal 2013 la fà 'n pas indrē in clasìfica e la sò stagiòṅ la và mâł asè a part 'n ITF vins a Minsk in Nuvémbar. Al sò 2014 'l è praticamènt cumpàgn, la rusa la s déśda sōl a la fiṅ d'l an śugànd par tri vòlti in di ITF da vintsìnc-mila dòlar a Sharm el-Sheikh, vinsénd-an òṅ e faghénd semifinàl e quàrt in chi àtar. La Gasparjan la sèra 'l an a 'l 217śum pòst dal ranking.
La rusa la càmbia regìst'r a 'l inìsi dal 2015 quànd la vins dū ITF da vintsìnc-mila dòlar e òṅ da sinquànta-mila a Croissy-Beaubourg. In Maǵ la pasa 'l qualificasiòṅ a 'l Roland Garros ma pò la và fóra a 'l prim tùran cun l'Ana Konjuh. La fà àtar tant anc a Wimbledon in dua la cata subìt la Serena Williams ch'la vins sèg par 6-4 6-1. In Luj la s qualìfica a Ìstanbul e par pôc la n fà minga fóra la Cvetana Pironkova ch'la gh'à la méj sōl c'n al puntéǵ ad 0-6 7-6 7-6. La stmana dòp la tōś part a 'l turnèo ad Baku e la 'l vins baténd in d'l órdan la Dominika Cibulková par 6-3 7-5, la Zhaoxuan Yang par 6-4 6-4, l'Evgenija Rodina par 6-3 6-2, la Karin Knapp par 6-3 5-7 6-3 e la Patricia Maria Tig par 6-3 5-7 6-0. In cla manéra chè la gh la cava a insfilsàr-'s in dal primi sènt śugadōri dal mónd. In Utóbar la riva in di quàrt a Linz (3-6 4-6 da l'Anna-Lena Friedsam) e a Mósca (1-6 3-6 da l'Anastasija Pavljučenkova).
In dal 2016, dòp avér armuntâ a 'l prim tùran la Sara Errani ch'l'éra avànti sèg par 6-1 4-3 e servìsi, la Margarita la riva in di utàṿ a gl'Australian Open in du la céd a la Serena Williams par 2-6 1-6.