Ma ma - Tutto andrà bene
|
C'l artìcul chè 'l è scrit in
Miranduléś |
 Ma ma
| ||
| Ma ma - Tutto andrà bene | ||
 La Penélope Cruz in figùra dal film | ||
| Ma ma - A 'ndrà tut bèṅ 2015 | ||
|---|---|---|
| Regìa: Julio Medem | ||
| Scritōr: Julio Medem | ||
| Atōr: Penélope Cruz • Luis Tosar • Teo Planell Asier Etxeandia • Alex Brendemühl • Laura Prats Anna Jiménez • Silvia Abascal • Elena Carranza | ||
| Müsica: Alberto Iglesias | ||
| Léngua: Spagnōl | ||
| Dürä dal film: 111 minüt | ||
| Nasiōṅ: Spaggna • Frància | ||
Ma ma - Tutto andrà bene (Ma ma - A 'ndrà tut bèṅ) 'l è 'n film dramàtic dal 2015 scrit e dirèt par Julio Medem.
La pelìcula l'è stada preśentàda a 'l 40śum Fèstival Internasiunàł dal Film ad Turònt.
Sunt
Licensiàda da la scōla e mulàda par na dóna più śōvna da sò marè Raúl (Àlex Brendemühl), insgnànt ad filuśufìa, la Magda la vîṅ a savēr da 'l sò ginecòlug Julián (Asier Etxeandía) 'd avēr un cànc'r a na téta tant ch'la gh'à da tacàr subìt la chémio par psēr pò ès'r uperàda in présia ch'a gh'è da cavàr-la via tuta.
In chi dè lè, durànt na partìda 'd fólbar 'd sò fiōl pìcul Dani (Teo Planell) ch'l'éra andàda a véd'r a 'l stadi, la Magda la cgnós 'n uservadōr dal Real Madrid, Arturo (Luis Tosar). Mént'r i dascóran 'd sò fiōl, ch'l è dimóndi braṿ, 'l óm al ricév na telefunàda da 'l uśdàł ch'i gh dìśan che sò mujēr l'à péna fat 'n incidènt in màchina e ch'l'è in coma méntar la sò putìna l'è mòrta. Soquànt dè dòp a mōr anc la màdar e Arturo 'l armàgn da par lò.
Al daśgràsi dla vita i lìg'n insém i dū ch'i decìd'n ad tōr cà e far na famìja ma a 'l impruvìś, dòp che l'uperasiòṅ a la téta la parìva avēr fat sparìr dal tut al tumōr, durànt na vìśita 'd cuntròl a salta fóra che cal brut mâł lè 'l è turnâ incóra più fòrt esénd ch'al s è difùś dapartùt. Julián al gh diś ch'la gh'arà sōl siē méś da scampàr s'a gh và bèṅ. La Magda la decìd 'd avēr na putìna prima 'd murìr da ciamàr Natasha cuma la baghéta śōvna (Anna Jiménez) che 'l sò dutōr al vliva adutàr in Rùsia prima 'd mulàr-as cun sò mujēr.