Le notti erotiche dell'uomo invisibile
|
C'l artìcul chè 'l è scrit in
Miranduléś |
 La vie amoureusede l'homme invisible | ||
| Le notti erotiche dell'uomo invisibile | ||
 La Hanska e Valladares in na figùra dal film | ||
| Al nòt eròtichi d'l óm inviśìbil 1970 | ||
|---|---|---|
| Regìa: Pierre Chevalier | ||
| Scritōr: Pierre Chevalier • Juan Fortuny | ||
| Atōr: Howard Vernon • Fernando Sancho Brigitte Carva • Evane Hanska • Paco Valladares Isabel del Río • Arlette Balkis • May Chartrette | ||
| Müsica: Camille Sauvage • Claude Sauvage | ||
| Léngua: Francéś | ||
| Dürä dal film: 82 minüt | ||
| Nasiōṅ: Frància • Spaggna | ||
Le notti erotiche dell'uomo invisibile (Al nòt eròtichi d'l óm inviśìbil) 'l è 'n film ad scarésa francéś e spagnōl dal 1970 ad Pierre Chevalier.
Sunt
In na nòt ad piōva, un baghét al dmanda a 'l dutōr Garondet (Paco Valladares) 'd andàr a viśitàr al prufesōr Orloff (Howard Vernon) in dal sò castèl. Esénd un pòst luntàṅ par lò, al mèdag al paga òṅ in paéś par far-as scarusàr in fiṅ là ma a 'n sèrt punt al vîṅ fat śmuntàr śò lung la via e 'l è custrét a rivàr-'g a pē.
Dòp èsar-'s fat vèrar p'r al custôd (Eugène Berthier) al dutōr al gh'à la manéra 'd dascórar cun la dóna di fat (Evane Hanska) ch'la gh diś ch'a ciamàr-al lè l'è stada la fiōla dal prufesōr, la Cécile (Brigitte Carva). Chi lē la gh cònta ch'l'è in pinsēr par di lavōr ch'l è drē a far sò pàdar biòlug e ch'in cà l'à tacâ a védar di quèi strâṅ cuma dgl'òri in dal spèć o di ugèt ch'i s mōvan da par lōr. Garondet al và in dal laburatòri dal prufesōr e chi lò al gh diś ch'al gh l'à cavàda a dar vita a 'n èsar inviśìbil ch'a gh ubidìs.
Soquànt an prima 'l iva saplî la Cécile, ch'l'éra mòrta śōvna, e méntar 'l éra incóra drē a piànśar-la su 'l sò lèt al l'à pò vduda turnàr a cà. Chi lē la gh'iva cuntâ che la sò sarvidōra, la Maria (Isabel del Río), e 'l guàrda-casa (Fernando Sancho) i ìvan vèrt la sò casa da mòrt par fargàr-ag tut 'l òr ch'la gh'iva indòs par pò èsar punî tut dū.
Par punìr la dóna di fat ch'l'à fat vgnir dènt'r al furastēr, Orloff al la fà viulentàr da 'l óm inviśìbil pò al fà parśunēr al mèdag dgénd-ag che la sò criatùra l'à biśógn ad sànguv par campàr.