La coda dello scorpione
|
C'l artìcul chè 'l è scrit in
Miranduléś |
 La coda dello scorpione
| ||
 L'Anita Strindberg in na figùra dal film | ||
| La cóa dal scurpiòṅ 1971 | ||
|---|---|---|
| Regìa: Sergio Martino | ||
| Scritōr: Eduardo Manzanos Brochero Ernesto Gastaldi • Sauro Scavolini | ||
| Atōr: George Hilton • Anita Strindberg • Ida Galli Tom Felleghy • Janine Reynaud • Annalisa Nardi Alberto de Mendoza • Luigi Pistilli • Luis Barboo | ||
| Müsica: Bruno Nicolai | ||
| Léngua: Itagliàṅ | ||
| Dürä dal film: 95 minüt | ||
| Nasiōṅ: Itàglia • Spaggna | ||
La coda dello scorpione (La cóa dal scurpiòṅ) 'l è 'n film śal itagliàṅ e spagnōl dal 1971 ad Sergio Martino.
Par la part dla prutagunìsta a s éra pinsâ a l'Edwige Fenech, ch'l'iva tòlt part a 'l prim śal ad Martino Lo strano vizio della signora Wardh, ma pò a n s 'n è fat gnint parchè in alóra lì lē la gh'iva 'd avér fiōl.
Sunt
La sgnóra Lisa Baumer (Evelyn Stewart), armàśa védva dòp che sò marè Kurt (Fulvio Mingozzi) 'l è mòrt in dal sćiòp d'l aparéć ch'l iva tòlt p'r un viàś, la và a Aténe par mét'r-as in bisàca i bèsi dl'asicurasiòṅ ch'al gh'iva in sla vita, un migliòṅ ad dòlar. Ma qvi là, dòp avér-ag dâ incòsa, i pàg'n anc 'n investigadōr privâ, Peter Lynch (George Hilton), p'r andàr-'g a fónd, par védar se lē o 'n àtar al gh'è insaplâ dèntar, s'a s trata 'd 'n umisìdi: par lōr a gh'è quèl ch'a traśa. Ma l'è pròpria in dla sità gréca ch'la dóna la vèṅ masàda ad òpra 'd un sasèṅ ch'al gh pòrta via tut i bèsi.
Ólt'r a Peter, adès cun na mòrta in mèś, i s śònt'n anc di àtar a catàr la véra, tacànd p'r al funsiunàri dl'Interpol John Stanley (Alberto de Mendoza) e pasànd pò p'r al cumisàri dal pòst Stavros (Luigi Pistilli). A gh'è anc na giurnalìsta francéśa ch'la gh'à interès a dasquaciàr al carti par far al scoop dla sò vita, la bèla Cleo Dupont (Anita Strindberg), ch'la dvènta prèst anc l'amànta ad Peter. Ma i masamènt i cuntìnuan.