L'assassino ha riservato nove poltrone
|
C'l artìcul chè 'l è scrit in
Miranduléś |
 L'assassino ha riservatonove poltrone | ||
 La Rosanna Schiaffino in na figùra dal film | ||
| Al sasèṅ 'l à tgnû da part nóṿ pultròni 1974 | ||
|---|---|---|
| Regìa: Giuseppe Bennati | ||
| Scritōr: Giuseppe Bennati Paolo Levi • Biagio Proietti | ||
| Atōr: Rosanna Schiaffino • Paola Senatore Chris Avram • Eva Czemerys • Lucretia Love Janet Agren • Howard Ross • Eduardo Filipone | ||
| Müsica: Carlo Savina | ||
| Léngua: Itagliàṅ | ||
| Dürä dal film: 99 minüt | ||
| Nasiōṅ: Itàglia | ||
L'assassino ha riservato nove poltrone (Al sasèṅ 'l à tgnû da part nóṿ pultròni) 'l è 'n film śal dal 1974 ad Giuseppe Bennati girâ a 'l teàtar Gentile 'd Fabriàṅ e a 'l Òrt butànig ad Róma.
Sunt
Al nòbil ingléś Patrick Davenant (Chris Avram) al decìd ad far na fèsta in un sò teàtar sarâ da tèmp. Par 'l ucaśiòṅ al ciàma la sò muróśa śōvna ch'la vrév far l'atōra, la Kim (Janet Agren), al sò amìg pitōr e imbariagòs Russell (Howard Ross), ch'ad nascòst al s la gusa, la sò èx muróśa Vivian (Rosanna Schiaffino), dascargàda quànd 'l iva savû ch'la fava la sòcla, al mèdag Albert (Andrea Scotti) prumés spóś dla Vivian, sò surèla lèśbica Rebecca (Eva Czemerys) cun la sò amànta, la Doris (Lucretia Love), sò fiōla Lynn (Paola Senatore) e 'l sò muruśèṅ Duncan Foster (Gaetano Russo).
Rivâ a teàtar, al grup al gh cata 'n tisi misterióś (Eduardo Filipone) ch'al gh'à adòs un guru celèst, pò qualchidòṅ al próa a masàr Patrick faghénd-ag cascàr in cô un trâṿ 'd légn. Par furtùna 'l óm al fà in tèmp a far-as da na banda ma pò al fà a mènt che tut i sò òspit i gh'arévan di mutìṿ vàlid par far-al fóra. Quànd però la Kim, ch'la stava sèg sōl p'r i bèsi, la mōr bcànd-as na scurtlàda in dla schina in dal méntar ch'la recitàva in sal palc, chi àt'r òt i capìsan che fra 'd lōr a gh'è 'n sasèṅ e ch'l incidènd dal trâṿ al n éra briśa stâ na daśgràsia.
I òspit i próan a scapàr via ma tut i us i èṅ sarâ a ciàṿ c'n al cadnàs mis e anc al telèfun al n funsióna minga parchè i fìi i èṅ stâ tajâ. Più tard, dòp che Russell al vîṅ catâ impicâ, Patrick al véd in na pergaména antìga di diśégn cun dal figùri ch'i arcòrd'n i masamènt fat, fra 'l àtar a gh vîṅ anc in mènt che pròpria sènt an prima di sò parènt i éran stâ cupâ tut in cal stés teàtar.
Òṅ a òṅ i sò òspit i vìnan masâ da 'n tisi cun na mascra adòs e 'n tabàr vérd, tacànd da 'l dū lèśbichi.