Irène
|
C'l artìcul chè 'l è scrit in
Miranduléś |
 Irène
| ||
 La De France e Putzulu in na figùra dal film | ||
| id. 2002 | ||
|---|---|---|
| Regìa: Ivan Calbérac | ||
| Scritōr: Eric Assous Ivan Calbérac • Benoît Labourdette | ||
| Atōr: Cécile De France • Bruno Putzulu Agathe de La Boulaye • Patrick Chesnais Olivier Sitruk • Valérie Moreau • Gérard Chaillou Patrick Chesnais • Estelle Larrivaz • Vuthy Ly | ||
| Müsica: Laurent Aknin • Muse Julien Schultheis • Paul Weller | ||
| Léngua: Francéś | ||
| Dürä dal film: 98 minüt | ||
| Nasiōṅ: Frància | ||
Irène (id.) l'è na cumèdia francéśa dal 2002 'd Ivan Calbérac, numinàda a la 28śma edisiòṅ di Prèmi César cuma “òpra prima” mijóra.
Sunt
Ag brut quèl èsar puta, 'l è qvél ch'la pènsa l’Irène (Cécile de France) ch'l'è rivàda a trént'an sénsa avēr-ag minga 'l muróś. I sò genitōr, la Jacqueline (Evelyne Buyle) e Henri (Gérard Chaillou), i vaṅ sèmp'r adrē e anc la sò amìga Sophie (Estelle Larrivaz) la créd ch'la gh'àppia pròpria biśógn 'd 'n óm ch'al gh dàppia dū cōlp, cum al fà 'l sò Martin (Vincent Leenhardt) sèg. Anc na sò vśina 'd cà ciciòna, la Marion (Valérie Moreau), la gh'à 'n amànt mo lē invéci gnint. Al prubléma dla ragàsa l'è ch'la vrév 'n óm gustóś, simpàtig, cun dla cultùra e anc blèṅ via, ma l'è difìcil catàr-'l in gir.
Dòp avēr spatinâ a Parì da la Nurmandìa par lavōr a 'l servìsi dal cap-ufìsi Gazet (Patrick Chesnais), la cgnós lè la culéga Salomé (Agathe de La Boulaye) e 'l manager finansiàri Luca Di Matteo (Oliver Sitruk) inamurànd-'ś ad lò. La dóna la próa acsè a tacàr butòṅ sèg ma l'è piutòst ingiangulàda. In cal méntar, esénd ch'al sò apartamènt al gh'à biśógn ad soquànt intervènt, la ciàma 'n śbiangśèṅ par pituràr i mur, François (Bruno Putzulu), un śōvan séparâ cun na putìna pìcula ch'al n à mia finî i sò studi e ch'al fà fadìga a 'rmàgn'r a 'l sò pòst. Méntar l’Irène l'è via, lò al dróa 'l frigo, la cuśìna e la dócia sénsa dmandàr-'g al parmés prima, acsè la dóna la s arlìa sèg parànd-al via.
L’Irène la gh la cava a far-'s amìg Luca tacànd a dascórar sèg in chat a la sira ma tut 'd un trat chi lò al gh diś 'd èsar partî par Tòkyo par lavōr e ch'al gh'armagn'rà par di méś. Mo l'è tuta na bala esénd ch'al śōv'n al gh cata gust a 'vēr dal relasiòṅ sōl in internet cun la webcam.