Il mostro di St. Pauli
|
C'l artìcul chè 'l è scrit in
Miranduléś |
 Der goldene Handschuh
| ||
| Il mostro di St. Pauli | ||
 La Greta Sophie Schmidt in na figùra dal film | ||
| Al móst'r ad St. Pauli 2019 | ||
|---|---|---|
| Regìa: Fatih Akin | ||
| Scritōr: Heinz Strunk • Fatih Akin | ||
| Atōr: Jonas Dassler • Katja Studt • Tristan Göbel Martina Eitner-Acheampong • Greta Sophie Schmidt Margarete Tiesel • Marc Hosemann • Hark Bohm Adam Bousdoukos • Philipp Baltus • Heinz Strunk | ||
| Müsica: FM Einheit | ||
| Léngua: Tedésc • Grèc • Itagliàṅ | ||
| Dürä dal film: 115 minüt | ||
| Nasiōṅ: Germàgna • Frància | ||
Il mostro di St. Pauli (Al móst'r ad St. Pauli) 'l è 'n film dramàtic e biugràfic tedésc e francéś dal 2019 ad Fatih Akin trat da 'n rumànś dal scritōr Heinz Strunk ch'al cònta la vita 'd al sasèṅ seriàł Fritz Honka ch'in di an Stanta 'l à masâ almànc quàtar dóni.
'L è stâ preśentâ a 'l 69śum Fèstival 'd Berlîṅ e 'l à fat sù siesènt-mila dòlar a 'l incìrca. St. Pauli 'l è 'n quartēr dla sità 'd Ambûrg in Germàgna.
Sunt
Fritz Honka (Jonas Dassler) 'l è 'n uperàj puòs ch'al viṿ in un cèso 'd mansàrda 'd daśdòt mq a Ambûrg impinìda 'd fóto 'd dóni nûdi a 'l mur. Fiōl 'd un cumunìsta purtâ in un camp ad stermìni, al gh'à sèmp'r abû di prubléma cun cal dóni anc par via dal fat ch'al n è minga tant élt e piutòst brut in ghigna esénd balûg e c'n al naś stòrt da quànd 'l à fat 'n incidènt. Al pasa dagnóra tut al siri in n'ustariàsa in dal quartēr a luś rósi 'd St. Pauli ciamàda Der Goldenen Handschuh (Al Guànt 'd òr) in du al śibìs da bév'r a dal vèci par purtàr-'s-li a lèt anc s'al fà fadìga pò a gusàr-li.
Dòp avēr masâ na dóna e avēr-la scavśvàda in soquànt pès c'n un śghét, Fritz al cgnós a 'l Guànt 'd òr na vècia sénsa téǵ cun la dintéra ciamàda Gerda Voss (Margarete Tiesel) ch'la decìd 'd armàgn'r a vìvar sèg parchè la n sà mia in du andàr anc se lò al la trata mâł e al la gusa c'n un cuciàr 'd légn. 'L óm al vrév però far-as sò fiōla, na maslàra ciamàda Rosi, o, incóra méj, na studènta ch'l à vdû par strada, la Petra Schulz (Greta Sophie Schmidt).
Quànd la Gerda la'l mòla, tgnénd adrē a na magiōra d'l Eśèrcit dla Salvésa ch'la gh śibìs al sò ajùt, Fritz al tórna a 'l Guànt 'd òr par purtàr a cà di atri dóni. I pèrdan la vita prima l’Anna (Barbara Krabbe) pò na ciciòna ch'l'iva pruâ a fargàr-ag di bèsi. 'L óm al lóga pò i pès di cadàva'r in dal tasèl mòrt o da drē dal camèṅ, pruvànd a quaciàr la pusa cun dal parfùm e di Arbre Magique dapartùt. In cal méntar al taca anc a lauràr cuma guardiàṅ nutùr'n in un sèntar cumersiàł in du al cgnós na dóna dal pulisìi ch'al próa a viulentàr, la Helga Denningsen (Katja Studt).
Na nòt, mént'r al tîṅ adrē a la Petra ch'la và a cà, al pasa davànti a 'l sò palàs in du a s véd al sò apartamènt ch'l è drē a bruśàr. I vìgii, in dal méntar ch'i èṅ drē a śmursàr al fōg, i càt'n i cadàvar dal vitmi.