I tre volti del terrore
|
C'l artìcul chè 'l è scrit in
Miranduléś |
 I tre volti del terrore
| ||
 La Terregna e Reggente in na figùra dal film | ||
| Al tri ghigni dal terōr 2004 | ||
|---|---|---|
| Regìa: Sergio Stivaletti | ||
| Scritōr: Sergio Stivaletti • Antonio Tentori | ||
| Atōr: John Phillip Law • Elisabetta Rocchetti Riccardo Serventi Longhi • Emiliano Reggente Simone Taddei • Andrea Bruschi • Shanti Firenze Ambre Even • Roberta Terregna • Lamberto Bava | ||
| Müsica: Maurizio Abeni | ||
| Léngua: Itagliàṅ | ||
| Dürä dal film: 85 minüt | ||
| Nasiōṅ: Itàglia | ||
I tre volti del terrore (Al tri ghigni dal terōr) 'l è 'n film ad scarésa a epiśòdi dal 2004 ad Sergio Stivaletti.
La pelìcula, divìśa in tri capìtui intitulâ „'L anèl dla Luna“, „Dr. Lifting“ e „Al guardiàṅ dal lâg“, la pōl cuntàr su i camèo ad Claudio Simonetti e 'd Lamberto Bava.
Sunt
Durànt un viàś in trêṅ, al prufesōr Peter Price (John Phillip Law), siensiâ espèrt in iluśiòṅ e in d'l ipnutiśàr la gint, al taca a far dū paròli cun tri śōvan ch'i s càt'n in dal sò vagòṅ: Carlo (Emiliano Reggente), Marco (Riccardo Serventi Longhi) e la Sandra (Ambre Even). Al dutōr al ślunga na bòcia 'd òr a i tri ragàs che, guardànd-la, i gh'aṅ la manéra ad vìv'r in prima parsòna di fat ad sànguv, cuma si fùsan di insùni cunfùś.
prim epiśòdi: 'L anèl dla Luna
Marco e 'l sò amìg Fabio (Andrea Bruschi), su incàrag dal culesiunìsta 'd ròbi antìghi Monti (John Phillip Law), i decìdan 'd andàr a visitàr ad nascòst un sit etrùsc par purtàr via 'l teśôr dna mùmia. Prima 'd scapàr via Marco al śgranfgna via 'n anèl a fórma 'd lóv da la maṅ dal cadàvar. Turnâ a cà, al s al próa ma pò al n è più bòṅ ad cavàr-'s-al via. 'L è 'l inìsi dna trasfurmasiòṅ ch'la 'l purtarà a dvintàr, cla nòt lè ch'a gh'è la Luna pîna, un lóv manàr.
secónd epiśòdi: Na ghigna parfèta (Dr. Lifting)
La Barbara (Elisabetta Rocchetti) la và a tōr la sò amìga Sandra, ch'l'à péna finî 'd far na séna su 'l set dal film Dèmoni ad Lamberto Bava, p'r andàr insém a la clìnica 'd belésa dal dutōr Henry Fisher (John Phillip Law). La Barbara la vōl far 'n intervènt par sumiliàr sèmpar da piò a la sò amìga esénd ch'l'è fisàda da sèmpar cun la ghigna parfèta dla Sandra. Quànd chi lē la sènt un quèl dal gènar a 'l inìsi la n è minga 'd acòrd ma pò, par cuntintàr-la, la decìd 'd andàr via c'n al cirùśig plàstic par far-as far dal fóto da tgnir a mudèl. A pasa 'l tèmp e a n riva ninsòṅ tant che la Barbara la s insuspetìs. Girànd par la strutùra la ragàsa la sènt n'infarméra dir ch'l'è tut prònt mo ch'adès a gh'è da far sparìr la Sandra.
tèrs epiśòdi: Al guardiàṅ dal lâg
Carlo, insém a i sò amìg Alex (Simone Taddei) e Anna (Roberta Terregna), al decìd ad pasàr na giurnàda a 'l lâg e 'd armàgn'r a durmìr lè, davśèṅ a 'l fōg e sóta 'l stéli. A 'n sèrt punt a riva 'n guardiàṅ (John Phillip Law) ch'al vrév paràr via i tri śōvan parchè cal pòst lè, a sò dita, 'l è periculóś. Carlo al decìd ad partìr dabòṅ a 'l cuntràri di chi atar dū ch'i preferìsan star lè incóra a far i purcùs. Da gl'àqui dal lâg a salta fóra 'n leviatàṅ ch'al s mōṿ traśànd cuma na bisa e p'r i dū ragàs a n gh'è gnint da far.