Gene Simmons

C'l artìcul chè 'l è scrit in Miranduléś

Chaim Weitz, cgnusû méj cuma Gene Simmons ma anc cuma Eugene Klein (Tirat Carmel, 25 'd Agóst dal 1949) 'l è 'n cantànt, basìsta e atōr iśraeliàṅ naturaliśâ americàṅ, cgnusû prinsipalmènt p'r ès'r òṅ di mémbar fundadōr dal grup hard rock di Kiss in du al gh'è sèmpar stâ da 'l inìsi esénd-'n al leader insém a 'l chitarìsta Paul Stanley méntar lò al sòna 'l bas. In di cuncèrt 'l è famóś p'r al sò nùmar dal „magna-fōg“ e par sbrudlàr sànguv par la bóca.

Al sò scutmàj 'l è Dèmun par via dal custùm e dla mascra ch'al s éra sarnî p'r al sò persunàǵ. 'L à scrit, da par lò o insém a di àtar, dimóndi sucès dal grup cuma Deuce, She, Rock and Roll All Nite, Unholy, I Love It Loud, Calling Dr. Love e She. In dal 2004 'l à fat vgnir fóra 'n disc sulìsta ciamâ Asshole scrit cun la culaburasiòṅ ad Bob Dylan, Dave Navarro, Richie Kotzen, Dweezil Zappa e Bruce Kulick.

Da i an Utànta 'l à tacâ anc na caréra da atōr tulénd part a soquànti pelìculi cuma Runaway (cun Tom Selleck prutagunìsta) e Morte a 33 giri insém a Ozzy Osbourne.

Gene 'l è bòṅ ad dascórar in tri léngui: ingléś, Iśraeliàṅ e Ungheréś, qvésti chè parchè 'l è ebrèj cun di urìgin magiàri (sò màdar Flóra l'è scampàda da 'n camp ad stermìni naśìsta). Al gh'à abû dal stòri 'd amōr cun la Cher e cun la Diana Ross prima 'd spuśàr-as cun l'èx cunìna 'd Playboy Shannon Tweed ch'la gh'à dâ dū fiōi, Nick e la Sophia.