Femmine carnivore
|
C'l artìcul chè 'l è scrit in
Miranduléś |
 Die Weibchen
| ||
| Femmine carnivore | ||
 L'Uschi Glas in na figùra dal film | ||
| Fémni magna-carna 1970 | ||
|---|---|---|
| Regìa: Zbyněk Brynych | ||
| Scritōr: Manfred Purzer | ||
| Atōr: Uschi Glas • Alain Noury • George Ardisson Irina Demick • Pascale Petit • Françoise Fabian Judy Winter • Anne-Marie Kuster • Tanja Gruber | ||
| Müsica: Peter Thomas | ||
| Léngua: Tedésc | ||
| Dürä dal film: 90 minüt | ||
| Nasiōṅ: Germàgna Òvest • Itàglia • Frància | ||
Femmine carnivore (Fémni magna-carna) 'l è 'n film ad scarésa dal 1970 ad Zbyněk Brynych.
Sunt
L’Eva (Uschi Glas) l'è na ragàsa 'd vint-quàt'r an ch'la lavóra sóta padròṅ e ch'la gh'à 'n eśaurimènt narvóś. Al sò mèdag al gh cunsìlia 'd andàr a far-as curàr par siē stmani in dla clìnica par dóni dla dutōra Barbara (Gisela Fischer) a Bad Marein in Germàgna. Rivàda là, cumpagnàda par l'infarméra Anna (Irina Demick), la śōvna la cgnós dgl'atri dóni ciucàdi in dla suca cuma la Xenia (Tanja Gruber), ch'la s pasa 'l tèmp a far di vistidèṅ par putèṅ a 'l uncinét anc se di fiōi la n gh 'n à minga, l’Olga (Judy Winter), ch'la vōl sèmpar cmandàr lē lè dèntar, la Miriam (Pascale Petit), ch'a gh piàś sèmpar schersàr, l’Astrid (Françoise Fabian), ch'la lèś di lìb'r in cuntinuasiòṅ, e n'atra bruna ch'la guàrda sèmpar dal rivìsti pòran cun di óm nûd insìma. In dla clìnica a gh'è sōl dal dóni a part al giardinēr mut Adam (Fred Coplan) ch'al sarvìs a far i lavōr ad fadìga.
In cal mént'r i rìv'n in paéś tri óm ch'i gh'aṅ la màchina buciàda da giustàr: al femnàr Tommy (George Ardisson), al ciciòṅ Leo (Klaus Dahlen) e Olaf (Kurt Zips). Anc chi lōr, vdénd ch'al mecànig l'è na dóna ciamàda Dolly (Anne-Marie Kuster), i faṅ a mènt ch'in sità di masć a n gh 'n è briśa ma a lōr a n gh in ciàva gnint parchè i péscan da gusàr anc s'i èṅ bèla spuśâ. La Dolly la i spedìs in dla clìnica e a taca na fèsta quànd i rìvan ma cal dóni i gh faṅ anc la fèsta dabòṅ cupànd prima Olaf e pò Leo. L’Eva la véd tut e la próa a cuntàr incòsa a la pulisìa ma a n gh'è gnint da far parchè lè i èṅ tut 'd acòrd: in dla clìnica a gh'è 'n grup ad fémni magna-carna ch'i s cumpòrtan cuma dal màntidi che dòp 'l acupiamènt i màgn'n i masć.