Femina ridens
|
C'l artìcul chè 'l è scrit in
Miranduléś |
 Femina ridens
| ||
 Philippe Leroy in na figùra dal film | ||
| Fémna ch'la rid 1969 | ||
|---|---|---|
| Regìa: Piero Schivazappa | ||
| Scritōr: Giuseppe Zaccariello Paolo Levi • Piero Schivazappa | ||
| Atōr: Philippe Leroy • Dagmar Lassander Lorenza Guerrieri • Varo Soleri • Mirella Pamphili | ||
| Müsica: Stelvio Cipriani | ||
| Léngua: Itagliàṅ | ||
| Dürä dal film: 88 minüt | ||
| Nasiōṅ: Itàglia | ||
Femina ridens (Fémna ch'la rid) 'l è 'n śal dramàtic dal 1969 ad Piero Schivazappa.
In dal film a s véd na statṿa dla figa dintàda ch'la tōś spunt da l'òpra 'd Niki de Saint Phalle, Jean Tinguely e Per Olof Ultvedt.
Sunt
Al dutōr Sayer (Philippe Leroy), migliardàri diretōr 'd 'n istitùt filantròpig, al gh'à 'n segrét ch'al tîṅ lugâ, qvél 'd èsar na parsòna cumplesàda in fat ad sès da quànd da pìcul 'l à vdû na fémna 'd scurpiòṅ masàr e magnàr al masć dòp avēr ciulâ. Na sira, prufitànd-as dal fat che na giurnalìsta ciamàda Mary (Dagmar Lassander) l'éra vgnuda a cà sua par tōr di lìbar, al decìd ad dar-ag la śdòrmia par far-la parśunēra e tacàr acsè un śōg sàdig sèg.
'L óm al la liga atàc a na cróś e al la custrìnś a baśàr un fantòs ch'al gh sumìlia, pò al gh mét dal manéti lasànd-la da par lē a pinsàr che prèst al la cuparà. Sayer al fà véd'r a la Mary dal fóto 'd atri dóni da lò turturàdi dgénd-ag ch'al li à cupàdi p'r al gust ad far-li patìr, specialmènt a livèl psiculògic, parchè i sànan ch'i muriràṅ anc s'i gh'aṅ listés in cōr suo na spransa piculìna ad scampàr-la.
Dòp avēr purtâ la ragàsa dagnóra a 'l punt ad tōr-as la vita, 'l óm al gh cunfèsa ch'l'éra tuta na cumèdia, ch'al pagàva dal putàni, cuma na sòcla (Mirella Pamphili) ch'la gh'iva da ès'r a 'l sò pòst, par recitàr la part dla dóna schisa e in sò putēr custréti a far tut qvél ch'al vliva lò e ch'adès, vdénd-la da par lē a cà sua, 'l iva tòlt l'ucaśiòṅ ad far un śōg véra anc s'l à capî a la fiṅ ch'al n è minga bòṅ ad masàr dabòṅ.
La Mary la decìd ad jutàr-'l a pasàr cal distùrub lè ch'al gh'à in di cunfrònt ad cal dóni ma Sayer al n s rénd minga cònt 'd èsar drē a finìr in trapla.