Dana Plato
|
C'l artìcul chè 'l è scrit in
Miranduléś |
La Dana Michelle Strain, cgnusùda méj cuma Dana Plato (Maywood, 7 ad Nuvémbar dal 1964 - Moore, 8 ad Maǵ dal 1999), l'è stada n'atōra americàna, cgnusùda specialmènt p'r al rōl dla Kimberly Drummond in dal telefìlm Il mio amico Arnold che lē l'à intepretâ da 'l 1978 a 'l 1986.
Biugrafìa
La caréra dla Plato la taca a sèt an faghénd dla reclàm e pò girànd di telefìlm cuma L'uomo da sei milioni di dollari, In casa Lawrence e What Really Happened to the Class of '65?. A la fiṅ di an Stanta, prima 'd catàr al sucès cun la série televiśìva Il mio amico Arnold, la tōś part a tri film: L'esorcista II - L'eretico (1977), Return to Boggy Creek (1977) e California Suite (1978).
Dòp ès'r armàśa gravda a séd'ś an 'd sò fiōl Tyler Edward Lambert, la vîṅ lasàda a cà da la série girànd sōl soquànt epiśòdi dal stagiòṅ sèt e òt. La Plato la fà fadìga a lauràr e in dal 1989 la fà 'n servìsi par Playboy dòp èsar-'s arfàta 'l téti, pò la gira anc dal pelìculi purcùsi, softcore e di film ad quàtar sòld par scampàr. In séguit la finìs in buléta e in dal gir dla dròga, un brut quèl ch'a s śònta a i sò prubléma 'd bulimìa e cun la butìglia. In dal 1991 l'è stada arestàda a Las Vegas dòp avēr fat na rapìna[1].
In dal 1999 l'è stada catàda in overdose da fàrmag da 'l sò muróś 'd in alóra, Robert Menchaca, in dla roulotte in du l'éra custréta a vìvar. La Plato l'è pò mòrta ch'la n gh'iva gnanc trénta-sinc an. In dal 2010 anc sò fiōl al s è cupâ a vint-sinc an tirànd-as na sćiuptàda a la tèsta.
Filmugrafìa
- 1977 - L'esorcista II - L'eretico (Exorcist II: The Heretic), regìa ad John Boorman
- 1977 - Return to Boggy Creek, regìa ad Tom Moore
- 1978 - California Suite, regìa 'd Herbert Ross
- 1989 - Prime Suspect, regìa ad Thomas Constantinides e Bruce Kimmel
- 1992 - Night trap, regìa ad James W. Riley
- 1992 - Le voci del silenzio, regìa ad John Martensen
- 1992 - Bikini Beach Race, regìa 'd Eric Louzil
- 1995 - Evidenza sospetta, regìa ad Donald Farmer
- 1995 - Letal cowboy, regìa ad Rachel Gordon
- 1995 - Millenium day, regìa 'd Ulli Lommel
- 1997 - Blade boxer, regìa ad Bruce Reisman
- 1997 - Tiger, regìa ad Serge Rodnunsky
- 1998 - Different Strokes, regìa ad Michael Paul Girard
- 1998 - The hostage, regìa ad Bryan Todd
- 1998 - Desperation boulevard, regìa ad Greg Glienna
- 1999 - Silent Scream, regìa ad James Chean
- 2002 - Pacino is missing, regìa 'd Eric Galler
Culegamènt estéran
Nòti
- ↑ I èṅ pasâ 38 an da “Al mè amìg Arnold”, un telefìlm maladî Daily Best, 2 ad Nuvémbar dal 2016