C'l artìcol chè 'l è scrit in Carpśàn Emiliàn

Na cruàta 'dl istê

La cruàta (it. cravatta) l'è 'n acesóri elegànt dal vestimèint 'd chi òm chè in dl Osidèint, a fórma 'd banda lunga e sutìla, che dintór'n al côl, la pasa sòt' al gulèt dla camìśa e dòp dal só nōd laburê, la va śò cuacènd i ptòun dla camìśa infìn a 'rivèr a l'altèsa dla sintùra.

La lunghèsa dal cruàti l'è quèśi sàimper ed 150 cm, mo se 'l òm 'l è dimòndi élt, o 'l vōl arvujèr al nōd piò e piò vòlti (cunsùm in dla lunghèsa ed la stòfa), a pól ès'r-egh biśògn ed na cruàta piò lunga, c'ma 'd 165 cm. El varietê di disègn o di culōr edla stòfa i pōl'n ès'r infinìdi, mo i disègn 'l è méj ch' i sìen cichîṅ, tgnû còunt edl'àrea cichìna purtèda vìa da la cruàta.

Al nōd normêl ch'a s fà in dal cruàti 'l è a 4 gîr, mo vlènd a s pōl fèr-egh'n anca 6, 7, 8 o 9 gîr (s'a s egh vōl dèr 'n aspêt stravagànt).

La manéra dal nōd a 4 gîr

D'in dû a deśvìn al só nòm

Na spéci tradisiunèla 'd cruàta l'era druèda da soquànt suldê cruêt (hrvat) chi cumbatìven in dl eśèrcit francéś sòt'a Luì XIII in dal diciasetéśum sècol. Al gùst p'r al druamèint ed cla cruàta chè al rivarà infìn al rè Luì XIV, al rè Sōl e 'l nòm, da sièrpa cruàta a dìr di cruêt, al dvintarà sōl cruàta.

Ligàm a fōra