Coming Soon (film 2008)
|
C'l artìcul chè 'l è scrit in
Miranduléś |
 Program na winyan akat
| ||
| Coming Soon | ||
.png) Chantavit Dhanasevi in na figùra dal film | ||
| A vgnir subìt 2008 | ||
|---|---|---|
| Regìa: Sophon Sakdaphisit | ||
| Scritōr: Sophon Sakdaphisit Chanajai Tonsaithong • Kongkiat Khomsiri | ||
| Atōr: Chantavit Dhanasevi • Sarinrat Thomas Vorakarn Rojjanavatchra • Oraphan Arjsamat Nimit Pandang • Thanatorn Oudsahakul | ||
| Müsica: Terdsak Janpan | ||
| Léngua: Tailandéś | ||
| Dürä dal film: 95 minüt | ||
| Nasiōṅ: Tailàndia | ||
Coming Soon (A vgnir subìt) 'l è 'n film ad scarésa tailandéś dal 2008 ad Sophon Sakdaphisit.
Al film 'l à muciâ sù dagnóra quàtar migliòṅ ad dòlar in tut.
Sunt
Al śōvan Shane (Chantavit Dhanasevi), dasfrutànd al fat ad lauràr in un cìnema, al gh la cava a 'vēr in anteprìma na còpia dna pelìcula 'd un film ad scarésa ch'al cònta 'd véndar piratâ par ciapàr di bèsi par tōr indrē 'l arlój dla sò muróśa Som (Vorakarn Rojjanavatchra) ch'l iva dâ, sénsa 'l sò parmés, a 'n banc di pégn par cumpràr-as dla dròga. Par cal fat lè i dū i s éran daśgustâ dimóndi.
La pelìcula, ciamàda Spìrit vindicatìṿ, la cònta di fat sucès dabòṅ dimóndi an prima. La Chaba (Oraphan Arjsamat), na vècia praticamènt plada e ciucàda in dla suca, dòp avēr cavâ via gl'òć e pò masâ soquànt putèṅ cardénd ch'i fùs'n i sò fiōi, l'éra finìda impicàda ad òpra dla gint dal pòst ch'la vliva far-'g-la cagàr s'la fus in bras a Dio.
Na sira Shane al cata in dla sala in du a s dava 'l film la telecàmera 'd un sò amìg in du a s véd lò sigàr da la paùra e pò finìr mòrt sénsa òć. Da cal mumènt lè Shane al taca a 'vēr di arbgàt ad cuntìnuv vdénd al fantàśma dl'atōra dapartùt. Dimóndi spavintâ e decìś a catàr na sulusiòṅ par saltàr-'g-an fóra, al partìs insém a la Som par pascàr la cà véra dla Chaba che la ragàsa l'iva vdû in na fóto in internet lśénd dal nutìsi 'd in alóra.
Rivâ in sal pòst i vìn'n a savēr che la vècia la n éra briśa mòrta impicàda, cum a s cuntàva, ma l'éra stada tiràda śò péna in tèmp giùst par finìr pò in manicòmi. La parsòna ch'l'éra mòrta dabòṅ invéci l'éra l'atōra dal film ch'l'iva pardû la vita girànd dimóndi vòlti la séna dl'impicagiòṅ parchè la n gh vgniva mai bèṅ.